DILI, 27 jullu 2023 (TATOLI)-–Primeiru-Ministru (PM), Kay Rala Xanana Gusmão husu ba Polísia Nasionál Timor-Leste (PNTL) atu detein joven ne’ebé mak kalan-kalan asalta ema iha dalan públiku hodi hadau sasán.
Xefe Governu hato’o orientasaun ne’e ligadu ho ikus-ikus ne’e joven balun hadau ema nia sasán iha tempu kalan bainhira ema lori hela motorizada.
“Ha’u bolu atensaun ba Polísia, bolu atensaun ba Ministru Interiór hodi haree ba ida-ne’e, haree tok iha ne’ebé mak akontese, hodi kaer ema sira-ne’e hatama iha kadeia para ita bele iha pás no seguru,” Xanana hateten hafoin reuniaun semanál ho Xefe Estadu, iha Palásiu Prezidensiál, Bairru Pite, kinta ne’e.
Notísia relevante : PNTL detein ona suspeitu sira ne’ebé hadau telefone iha Dili laran
Xanana konsidera ema ne’ebé halo interrupsaun ba movimentu públiku tenke simu ninia responsabilidade tanba ema hotu hakarak moris iha pás nia laran no ema hotu iha liberdade atu halo movimentu bá mai.
Jornalista : Antónia Gusmão
Editora : Julia Chatarina
