VIQUEQUE, 28 jullu 2023 (TATOLI)—Abitante postu Viqueque Vila, munisípiu Viqueque preokupa ho kondisaun dalan Lugatohi, suku Caraubalu ne’ebé kontinua monu hodi difikulta movimentu transporte.
“Ami preokupa dalan Lugatohi ne’ebé normaliza hosi empreza xinéz, normalizasaun ida-ne’e laiha solusaun tanba kada loron aterru hela de’it. Liu loron-rua ka tolu rai monu filafali ba mota, entaun daudaun ne’e rai ne’ebé empreza uza aterru nakonu ona iha mota, tempu udan mota tun bee bele fó impaktu ba komunidade sira-nia uma,” Xefe suku Caraubalu, João Pinto, hateten ba Agência Tatoli, iha área Lugatohi, sesta ne’e.
Nia reforsa, empreza xinéz halo aterru hafoin sira-nia transporte fuzu ne’ebé tula materiál rai-henek ba halo dalan hosi Venilale liga ba Viqueque hodi estraga dalan Lugatohi inklui aspal iha área jardín 59, nune’e daudaun aspal a’at hotu.
“Tanba ne’e ami hakarak rekomenda ba Governu liuhosi Ministériu Obra Públika (MOP) hodi haree ba asuntu ne’e hodi buka solusaun labele aterru beibeik, maibé la fó solusaun. Se dalan Lugatohi labele rezolve, ha’u oferese rai mota sorin ba Governu hodi loke dalan atu nune’e Lugatohi labele fó impaktu ba komunidade sira iha munisípiu Viqueque,” Autoridade suku fó hanoin.
Notísia relevante : Empreza hahú ona reabilita dalan rurál pakote 11 iha Viqueque
Iha fatin hanesan, Sosisadade Sivíl liuhosi Knua Haberan Komunidade (KHC), Agosto Pinto, nota katak kondisaun dalan Lugatohi hanesan ona dalan nasionál, maibé laiha dalan alternativu hodi fasilita movimentu komunidade Viqueque.
“Ho preokupasaun ida-ne’e, ami hakarak husu ba parte kompetente atu buka solusaun tanba karreta fuzu boot sira liu dalan halo rai sempre monu, entaun ita presiza atensaun, maski Governu entrega ona ba xinéz hodi halo normalizasaun, maibé seidauk iha solusaun,” nia hato’o.
Iha parte seluk, Sekretáriu munisípiu Viqueque, Teotónio Sarmento da Silva, informa, parte Autoridade munisipál rasik relata ona preokupasaun ne’e ba Governu atu buka solusaun, tanba maski normaliza ona, maibé empreza Xina ninia ekipamentu pezadu sira liu beibeik halo dalan monu filafali.
“Ita ezije atu rezolve lalais mós difísil. Depois ita-nia rai Lugatohi difísil tebes no ita mós respeitu kultutura tanba ha’u haree bainhira tempu udan rai-halai, maibé bainhira tempu la udan rai halai hotu ba mota. Tanba ne’e ami sei esforsu fó solusaun ba dalan Lugatohi,” nia akresenta.
Nune’e mós, Diretór Servisu Obra Públika munisípiu Viqueque, Marito do Rego, hateten, dalan ne’e ho naruk kilómetru 58, kompostu hosi trosu 1 kilómetru 23,38, hosi diresaun Baucau Venilale no trosu 2 kilómetru 34,62 diresaun Venilale to’o Viqueque ho totál orsamentu millaun $44, ne’ebé responsabiliza hosi empreza internasionál, China Overseas Engineering Grupu (COVEC).
Empreza COVEC uza osan daywork hodi aterru dalan Lugatohi ne’ebé uluk kotu, maibé daudaun ne’e bainhira dalan ne’e monu, empreza halo normalizasaun tanba sira-nia karreta liu dalan ne’e hodi tula rai-henek.
“Bainhira COVEC ninia projetu ramata, sira sei la halo normalizasaun, ne’ebé ba oin ita-nia Governu sei prevee orsamentu ba dalan Lugatohi hodi hadi’a,” nia tenik.
Liga ho kondisaun ne’e, Agência Tatoli seidauk hetan konfirmasaun hosi responsável empreza COVEC.
Tuir obserbasaun Agência Tatoli iha terrenu, nota katak iha dalan Lugatohi daudaun ne’e rai halai tun ba mota no espasu dalan hela metru ida ho balun, nune’e karreta rua labele hasoru malu iha dalan Lugatohi tanba dalan klo’ot ba beibeik.
Jornalista : Vitorino Lopes da Costa
Editora : Julia Chatarina
