Pasiente HIV/SIDA halai ses hosi tratamentu ho razaun imunidade forte
DILI, 28 jullu 2023 (TATOLI)—Prezidente Komisaun Nasionál HIV/SIDA, Atanásio de Jesus, informa, pasiente HIV/SIDA hamutuk na’in-307 halai ses hosi tratamentu no balun filafali ona ba rezidénsia ho kondisaun grave.
“Pasiente sira ne’e la’ós halai sai maibé sira lakohi kontinua tratamentu ho razaun balun katak sira-nia imunidade forte no hanesan fali ona ita normál, sira konsidera katak sira di’ak no la hetan vírus ne’e, ida-ne’e mak sai preokupasaun boot ida, kuandu sira-nia imunidade tun filafali no vírus ne’e komesa domina fali iha sira-nia isin, sira tenke mai halo fali tratamentu, ne’ebé esforsu hosi ONG sira inklui Ministériu Saúde maka buka tuir pasiente sira ne’e, daudaun sira kuaze metade filafali mai ona tratamentu, balun mai ho kondisaun grave,” Atanásio de Jesus, informa hafoin partisipa iha selebrasaun loron mundiál hepatite, iha salaun Timor Plaza, sesta ne’e.
Notísia relevante : Pasiente HIV/SIDA 307 halai hosi tratamentu
Nia dehan, parte Komisaun Nasionál kontinua esforsu halo sensibilizasaun ba komunidade, nune’e bainhira hetan sintoma ruma hanesan isin-manas no mear tenke hakbesik-an ba fasilidade saúde.
“Konserteza bainhira sira ba halo relasaun seksuál ho ema seluk sempre iha impaktu negativu ne’e ba ema seluk ne’e no todan,” nia akresenta.
Pasiente sira halo tratamentu iha ospitál rejionál, klínika Bairru Pité, no sentru saúde iha munisípiu.
Iha biban hanesan, Diretora Ezekutiva ONG Estrela+, Ines Lopes, hateten, razaun ne’ebé halo pasiente sira ses hosi tratamentu ida mak stigma no diskriminasaun, inklui influénsia ho ema seluk ligadu ho tratamentu tradisionál.
“Problema ba ema afetadu vírus ne’e ida mak stigma no diskriminasaun hosi atendimentu hosi fasilidade balun ne’ebé halo ema la sente konfortável, nomós haree ba distánsia hodi halo ema labele fasil atu asesu ba tratamentu, seluk maka haree mós ba ingluénsia hosi ema sira liga ba tradisionál katak bainhira deteta tiha sira deside halo tratamentu tradisionál nune’e sira lakohi kontinua ba fasilidade saúde,” nia akresenta.
Hahú hosi tinan 2003 to’o 2023, Ministériu Saúde rejista kazu HIV/SIDA iha territóriu nasionál hamutuk 1.830, ne’ebé hosi númeru ne’e, pasiente na’in-1.009 mak ativu hela tratamentu no na’in-192 mak hakotu ona vida.
Hosi dadus ne’e hatudu katak munisípiu Dili okupa númeru dahuluk ho totál kazu 1.372, tuir fali mak Bobonaro 111, Covalima 90, Rejiaun Administrativa Espesiál Oé-cusse Ambeno (RAEOA) 53 no Baucau 48.
Jornalista : Antónia Gusmão
Editora : Julia Chatarina
