SEI kapasita feto potensiál Viqueque partisipa vida polítika
VIQUEQUE, 28 jullu 2023 (TATOLI)—Ekipa hosi Sekretaria Estadu Igualidade (SEI) kapasita feto potensiál iha munisípiu Viqueque hodi motiva no hasa’e koñesimentu partisipa iha vida polítika.
Reprezentante hosi SEI, Clara Maria Valente, hateten, kapasitasaun ne’e hodi prepara maluk feto sira sai feto potensiál hodi bele konkorre ba iha eleisaun suku inklui nível polítika.
“Ohin ami fó kapasitasaun ba feto potensiál sira iha munisípiu Viqueque no motivasaun feto sira oinsá bele serbisu maka’as, oinsá ita bele kapasita-an atu hasoru situasaun sira ne’ebé presiza feto nia partisipasaun hodi fó nia kandidata iha vaga lideransa lokál nível suku, munisípál, no nasionál hodi feto mós kompete ho mane sira,” Reprezentante SEI hateten ba Agência Tatoli, iha atividade kapasitasaun, iha salaun Administrasaun, sesta ne’e.
Notísia relevante : SEI husu feto Viqueque envolve iha vida ekonomia
Nia dehan, maski iha momentu ne’ebá kandidatu feto atu lakon ka manán, maibé hatudu nafatin potensialidade atu kompete nafatin bainhira iha oportunidade.
“Ita lakon la signifika taka dalan ba feto sira-nia partisipasaun, maibé hanesan feto nafatin iha korajen atu partisipa no hatudu katak feto mós bele no prontu halo buat ruma ba rai ida-ne’e,” nia enkoraja.
Iha biban ne’e, Sekretáriu munisípiu Viqueque, Teotónio Sarmento da Silva, agradese ba ekipa SEI ne’ebé oferese ona kapasitasaun ba feto potensiál sira iha Viqueque.
“Formasaun ne’e bele hakbiit feto kompete ba pozisaun nível foti desizaun iha Sekretaria Estadu ba Igualdade liuhosi Departamentu Formasaun Partisipasaun Feto iha Polítika. Liuhosi formasaun ne’e, ha’u hanoin bele hasa’e feto potensiál Viqueque. Ita mai iha ne’e, la’ós atu hanorin malu maibé atu kompleta koñesimentu kle’an ne’ebé feto sira tenke iha ona preparasaun kompete iha eleisaun suku iha tinan ida-ne’e no bele fó korajen ba feto maluk sira atu partisipa iha kualkér kompetisaun ho mane sira,” nia tenik.
Konstituisaun RDTL fó biban hanesan ba feto, mensiona iha artigu 16 kona-ba igualdade jéneru katak feto no mane iha direitu hanesan partisipa iha kualkér atividade polítika, sosiál no ekonomia. Partisipasaun igualdade ho kuantidade feto iha kandidatura mós previstu iha Lei Eleitoral, Lei Suku númeru 9/2016.
Kapasitasaun ne’e oferese hosi formadór SEI durante loron-rua, hahú kinta no ramata sesta ne’e, ne’ebé hetan partisipasaun hosi feto potensiál hamutuk na’in-30 hosi postu lima inklui Xefe suku Bibileo.
Jornalista : Vitorino Lopes da Costa
Editora : Julia Chatarina
