LAUTÉM, 27 jullu 2023 (TATOLI) – Governu liuhosi Sekretaria Estadu Kooperativa (SEKoop) prioriza programa kooperativa iha setór agríkola liuliu produsaun ai-haan durante tinan-lima mai.
Sekretáriu Estadu Koperativa, Arsenio Perreira, esplika, setór kooperativa nu’udar parseiru importante hamutuk ho setór privadu sira atu tane ekonomia Timor-Leste.
“Espera programa ne’ebé IX Governu halo ita sei kontinua barak liután, la’ós de’it iha Lautém maibe iha fatin hotu,” Sekretáriu Estadu Kooperativa hateten iha suku Fuiloro, kinta ne’e.
Programa importante SEKoop ba tinan-lima mak hanesan produs banin been, mina kamí, mina nú, masin, hakiak animal liuliu karau atu hetan susu-been no kombina ho Bafo Kay Rala hodi halo produsaun integradu hodi fornese ba rai-laran hodi redus importasaun.
Nune’e, SEKoop kompromete sei prioriza programa iha setór kooperativa agríkola liuliu produsaun hodi kontribui redus importasaun no responde ba menus ai-haan iha Timor-Leste.
“Ho ita-hotu nia kooperasaun no serbisu hamutuk ita sei halo buat ruma ba ita-nia rai no aan-rasik,” Arsenio Perreira akresenta.
SEKoop sei koordena ho liña ministeriál sira hanesan Ministériu Agrikultura, Peska, Pekuáriaria no Florestra (MAPPF) hodi haree aspeitu infraestrutura inklui ekipamentu, Ministériu Saúde foa ba redusaun má-nutrisaun no Ministériu Edukasaun iha programa merenda eskolár.
Arsenio Perreira, esplika, bainhira Orsamentu Retifikativu pasa iha Parlamentu Nasionál, sei trasa planu no estratéjia durante tinan-lima hanesan matadalan ne’ebé sei fahé ba atividade iha kada tinan.
SEKoop sei bolu reprezentante kada munisípiu atu partisipa iha estratéjia ba programa refere iha tempu badak hodi fó kontribuisaun hanoin nune’e bele hatene no akompaña.
SeKop hamutuk Movimentu Kamponeze Timor-Leste (MOKATIL) komposta hosi membru feto no mane ne’ebé instala iha kada munisípiu ho tótal rihun-70 resin atu hahú book aan hodi hamoris fali kooperativa setór agríkola hahú hosi Lautém to’o Oecuse.
Notísia relevante: SEKoop lansa programa kuda Bafo Kay Rala iha Lautém
Jornalista : Natalino Belo
Editór : Evaristo Soares Martins
