DILI, 31 jullu 2023 (TATOLI)—Xefe Kaza Sivíl, Jesuina Maria Ferreira Gomes, hamutuk ho ekipa Prezidénsia Repúblika aprezenta ezekusaun Orsamentu Jerál Estadu (OJE) 2023 no proposta Orsamentu Retifikativu ba Primeiru-Ministru, Kay Rala Xanana Gusmão no Komité Revizaun Orsamentu.
“Primeiru-Ministru no Komité Revizaun Orsamentu husu atu haree didi’ak fali ezekusaun orsamentu ne’e tuir kategoria lima hanesan saláriu no vensimentu, bens no servisu, transferénsia públika, kapitál menór, no kapitál dezenvolvimentu. Ida-ne’e fasil liu tanba ida agora ita ho sistema ‘Dalan ba Futuru’ komplikadu tebes, ne’ebé aprezentasaun mós dala ruma komplika membru sira kompreende no akompaña didi’ak,” Xefe Kaza Sivíl hateten iha Ministériu Finansa, Aitarak-laran, segunda ne’e.
Notísia relevante : 10 agostu, Governu submete proposta Orsamentu Retifikativu bá PN
Antes ne’e, OJE 2023 ne’ebé aloka ba Prezidénsia Repúblika hamutuk millaun $12,280, ne’ebé hosi totál ne’e ezekuta ona millaun $5-resin ka 48% no sei hela millaun $6.
Aleinde ne’e, Xefe Governu husu Prezidénsia Repúblika atu organiza fali nia orsamentu no ezekusaun sira ne’e ba kategoria lima hodi haruka fali ba Ministériu Finansa.
“Kategoria lima ne’e mais fasil tanba Governu anteriór iha kategoria haat hanesan saláriu no vensimentu, bens no servisu, kapitál minór, no kapitál dezenvolvimentu, agora aumenta tan transferénsia públika, ne’e fasil tebes tanba ita bele organiza ita-nia osan, maibé sistema ida Governu anteriór halo ne’e iha ninia programa barak, kategoria barak ne’ebé dala ruma iha over leaping, ita klik iha fatin ida mosu fali iha fatin ida, ita laiha flesibilidade atu aprezenta ita-nia programa maibé ita enkaixa de’it ita-nia programa no atividade sira ne’e iha sistema ne’ebé iha ona, ne’ebé dala ruma difikulta ita iha aprezentasaun,” nia esplika.
Prezidésia Repúblika iha Orsamentu Retifikativu ne’e propoin millaun $5, liu-liu husu iha orsamentu ba pesoál nia saláriu no venstimentu no atu selu subsídiu, seguransa sosiál ba funsionáriu públiku inklui kontratadu sira iha Prezidénsia Repúblika, enkuantu montante saláriu no vensimentu propoin millaun $1-resin.
Jornalista : Antónia Gusmão
Editora : Julia Chatarina
