Top

Membru PN preokupa prosesu atribuisaun sidadania ba ema estranjeiru

Timor_Leste_(orthographic_projection).svg

DILI, 31 jullu 2023 (TATOLI)—Membru Parlamentu Nasionál (PN), liuhosi Deputadu bankada CNRT, Natalino dos Santos, preokupa ho prosesu atribuisaun sidadania ba ema estranjeiru atu sai sidadaun Timor-Leste.

Notísia Relevante:  Sertifikasaun sidadaun estranjeiru 168 sai sidadaun Timor iha faze finál

 

“Ha’u hakarak foti kestaun ida kona-ba sidadaun ita-nia inan feton sira hosi Indonézia kaben ho ema Timor kuaze balun tinan 40 ona sira seidauk hetan sira-nia sidadania. Balun iha tiha bei’oan ona, sira balun mai iha tinan 1975 kuandu invazaun sira tama tiha ona mai Timor hanesan iha área fronteira, Oé-Cusse, parte Suai no iha mós Maliana, ha’u hasoru kestaun barak. Sira dehan katak, ami hela iha Timor kleur ona, ami timoroan ona tanba iha oan no bei’oan tiha ona, maibé to’o agora ami seidauk bele hetan ami-nia kartaun eleitorál,” nia levanta liuhosi reuniaun plenária PN, segunda ne’e.

Deputadu hosi bankada Governu ne’e husu Ministériu Justisa liuhosi dirasaun servisu notariadu presiza haree prosesu atribuisaun sidadania ba sidadaun estranjeiru sira.

Deputadu FRETILIN, David Dias Ximenes ‘Mandati’, hateten Ministériu Justisa ho koordenasaun Ministéiru Administrasaun Estatál presiza haree didi’ak kona-ba prosesu atribuisaun nasionalidade ba ema estranjeiru sira-ne’ebé hela kle’ur ona iha Timor-Leste kaben ona ho ema  timoroan, maibé atu hetan de’it nasionalidade Timor prosesu naruk tebes.

Vise Ministru ba asuntu Parlamentár, Adérito Hugo, hateten preokupasaun ne’e rejista sei hato’o ba ministériu tutela hodi bele fó resposta.

Notísia Relevante: Sai Sidadaun Timór, Prosesu Bazea Ba Pedidu

Jornalista : Nelson de Sousa

Editór      : Cancio Ximenes

Publisidade

Leave a Reply

Latest Post

error: Content is protected !!