Uma ida iha aldeia Tobur ameasadu atu monu
COVALIMA, 31 jullu 2023 (TATOLI)–Vítima Eva Carodoso hateten, ninia uma ne’ebé lokaliza iha aldeia Tobur, suku Beco, postu administrativu Suai, munisípiu Covalima ne’e ameasadu atu monu tanba impaktu hosi dezastre naturál.
“Ha’u nia uma agora ameasadu atu monu tanba ai-riin ida monu tiha ona. Ne’e akontese tanba udan boot ne’ebé akontese iha 3-4 fulan-jullu tinan 2023 ne’ebé rezulta rai halai,” Eva Cardoso hateten ba Agência Tatoli iha aldeia Tobur, segunda ne’e.
Tanba kondisaun uma la seguru, nia parte daudaun ne’e provizóriamente sei hela hamutuk ho nia família sira hodi hein apoiu emejénsia no materiál rekuperasaun hosi Governu.
Xefe aldeia Tobur, Francisco Bandido, hateten relasiona udan boot ne’ebé akontese iha loron 3-4 fulan-jullu tinan 2023, ne’ebé hamosu dazastre naturál rai halai hodi fó impaktu ba komunidade na’in-ida nia uma ameasa atu monu.
“Loos duni, komunidade ida-nia uma ameasadu atu monu tanba rai halai,” nia dehan.
Xefe aldeia hanesan lideransa ne’ebé besik komunidade, nune’e kona-ba problema komunidade nia parte seidauk hato’o ba ministériu kompetente, nune’e vítima dezastre bele hetan apoiu emerjénsia no materiál rekuperasaun.
Vítima dezastre naturál ne’e seidauk hetan apoiu emerjénsia tanba xefe aldeia laiha númeru kontaktu no seidauk hato’o relatóriu ba Autoridade Protesaun Sivil (APC-sigla portugés), nune’e bele hetan apoiu emerjénsia no materiál rekuperasaun.
Tuir dadus Dirasaun Protesaun Sivíl Jestasaun Risku Dezastre Naturál Munisípiu Covalima rejista xefe família 730 sai vítima dezastre naturál iha Covalima, ne’ebé balun hetan ona apoiu emerjénsia no materiál rekoperasaun no balun seidauk hetan.
Jornalista : Celestina Teles
Editór : Cancio Ximenes
