iklan

EKONOMIA, HEADLINE

ANC no APNIC realiza formasaun kona-ba protokolu rede ba instituisaun Estadu

ANC no APNIC realiza formasaun kona-ba protokolu rede ba instituisaun Estadu

Ekipa APNIC fó formasaun IPv6 Deployment & IXP Deplopment Tutorial ba tékniku IT iha liña ministériu sira, iha salaun ANC, Caicoli, tersa (01/08/2023). Imajen Tatoli/Francisco Sony

DILI, 01 agostu 2023 (TATOLI)—Ministériu Transporte no Komunikasaun (MTK) liuhosi Autoridade Nasionál Komunikasaun Timor-Leste (ANC-TL), hamutuk ho parseiru Asia-Pacific Network Information Center (APNIC), tersa ne’e, realiza formasaun kona-ba protokolu internet versaun 6 (IPv6) deployment no pontu troka internet (IXP-Internet exchange point) deployment tutorial ba tékniku informátika hosi instituisaun relevante sira.

Ministru Transporte no Komunikasaun, Miguel Marques Gonçalves Manetelu. Imajen Tatoli/Francisco Sony

Ministru Transporte no Komunikasaun, Miguel Marques Gonçalves Manetelu, konsidera atividade ne’e importante tanba rekoñese papél no kontribuisaun infraestrutura dijitál ne’ebé avansadu bele dezenvolve sósiu ekonómiku nasaun ho di’ak.

“Objetivu formasaun ne’e atu haree ba ita-nia enderesu protokolu internet versaun 4 (IPv4) ne’ebé sai menus ba beibeik, entaun atu introdús fali versaun foun IPv6 hodi fornese solusaun viável hodi trata dezafiu sira. Timor-Leste presiza informasaun kona-ba teknolojia sira tanba iha era dijitál ne’e konetividade mak hanesan fundasaun hodi harii progresu no dezenvolvimentu ba adopta teknolojia resente liu, la’ós hanesan ona opsaun, ida-ne’e hanesan nesesidade prinsipál ida hodi nune’e bele sai relevante no kompetitivu nafatin iha era dijitál,” Ministru hateten iha salaun MTK, Caicoli.

Nune’e, Ministru husu partisipante atu aproveita formasaun ne’ebé sei hala’o durante loron-tolu ne’e ho di’ak hodi apreende protokolu rede ninia komplesidade no bele implementa efetivamente teknolojia transformadora iha rede sira.

Partisipante formasaun ne’e hosi instituisaun sira hanesan MTK, Mistériu Finansa (MF), Ministériu Justisa (MJ), Prokuradoria Jerál Repúblika (PGR, sigla portugés), Banku Sentrál Timor-Leste (BCTL, sigla portugés), Polísia Nasionál Timor-Leste (PNTL), Komisaun Antí-Korrupsaun (CAC, sigla portugés) no seluk tan.

Notísia relevante : ANC no parseiru Welchmankeen realiza workshop seguransa sibernétika

Programa ne’e ninia dezeñu atu forese ba partisipante sira hanesan ema tékniku, ne’ebé iha koñesimentu no kapasidade atu intende di’ak liu ba mundu IPv6 ho ninia implementasaun sira.

“Hosi biban ne’e, imi sei apreende IPv6 protokolu ho ninia sistema enderesamentu inklui sei hetan koñesimentu ba enderesu efetivu no estratejia implementasaun. Iha programa ida-ne’e, ita-boot sira sei enfrenta dezafiu ligadu ho tranzisaun no esplorasaun teknolojia oin-oin inklui tipu aprosimasaun hodi asegura integrasaun IPv6 nune’e aproveita ho didi’ak iha ita-nia rede sira,” nia tenik.

Hafoin termina formasaun IPv6 Deployment, partisipante balun sei kontinua tutoriál implementasaun IXP, ne’ebé sei esplora aspetu fundamentál sira.

IXP iha papél signifikativu iha formasaun ho senáriu dijitál iha nasaun ida tanba nu’udar pontu enkontru vitál ba rede sira hodi sai ida no hamutuk hodi troka tráfiku lokál no mantein tráfiku sira ne’e iha rai-laran de’it.

Komunikasaun ka troka lokál ida-ne’e la’ós de’it atu hasa’e liután dezempeñu rede, maibé atu asegura liután kolaborasaun entidade sira iha ekosistema dijitál ne’ebé dezenvolve lais tebes. Timor-Leste nota mós katak demanda ba servisu no konetividade internet aumenta ba beibeik, nune’e presiza atende demanda ida-ne’e no bele fornese eksperiénsia internet perfeita ba sidadaun sira importante tebes atu estabelese infraestrutura dijitál ne’ebé forte no interkonektadu.

“IXP ninia signifikadu importante tebes iha pontu ida-ne’e. Hau hakarak enfatiza IXP ninia importánsia iha prosesu dezenvolvimentu ekonomia dijital liuhosi promosaun troka dadus lokál, IXP redus ita-nia dependénsia ba tránzitu internasionál, kontribui ba redusaun kustu, mellora liután dezempeñu no seguransa internet ba negósiu no konsumidór sira,” nia tenik.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!