iklan

MUNISÍPIU, VIQUEQUE

Empreza sei kontinua manutensaun estrada Viqueque-suku Uma Uain Leten

Empreza sei kontinua manutensaun estrada Viqueque-suku Uma Uain Leten

Kondisaun estrada postu Viqueque Vila liga ba suku Uma-Uain Leten, tersa (01/08/2023). Imajen Tatoli/Vitorino Lopes da Costa

VIQUEQUE, 01 agostu 2023 (TATOLI)–Servisu Obra Públika munisípiu Viqueque halo ona koordenasaun ho empreza lokál, Samadare, ne’ebé hanesan responsável ba manutensaun estrada hosi postu Viqueque Vila liga ba  suku Uma-Uain Leten ho distánsia kilómetru 26 resin.

“Empreza sira hatan ona katak iha tempu badak nia laran sira sei halo manutesaun ba dalan kuak, hahú hosi postu Viqueque Vila to’o suku Uma Uain Leten. Tanba iha tinan kotuk sira halo uluk ona manutensaun ho durasaun tinan-rua, nune’e hela tinan ida-ne’e manutensaun hotu,” Diretór Servisu Obra Públika Viqueque, Mário do Rego, informa ba Agência Tatoli, iha postu Viqueque Vila, tersa ne’e.

Notísia relevante : Membru PN husu Governu loke estrada alternativu ba Viqueque Vila

Manutensaun estrada hahú implementa iha tinan 2022, ne’ebé empreza halo uluk ona manutesaun hodi taka dalan kuak no hadi’a dalan sira ne’ebé ameasadu kotu nune’e asegura movimentasaun ema no transporte.

“Kontratu ba empreza responsável daudaun ne’e sei la’o hela, nune’e empreza nia ekipamentu pezadu destaka hela iha área Motale. Ita mós sei haree kondisaun udan bainhira para ona ami sei orienta empreza hodi halo manutesaun tanba daudaun ne’e tempu udan halo dalan kuak barak,” nia akresenta.

Ekipa téknika hosi Servisu Obra Públika Viqueque akompaña empreza halo normalizasaun estrada.

Orsamentu ne’ebé aloka ba manutesaun estrada ne’e hamutuk $300.000 resin, ho durasaun serbisu tinan-rua, hahú tinan 2022 to’o 2023.

Jornalista     : Vitorino Lopes da Costa

Editora          : Julia Chatarina

iklan
iklan

Leave a Reply

iklan
error: Content is protected !!