iklan

NASIONÁL, JUSTISA, HEADLINE

PTR Deolindo atualiza servisu Tribunál ba Xefe Estadu

PTR Deolindo atualiza servisu Tribunál ba Xefe Estadu

Prezidente Tribunál Rekursu, Deolindo dos Santos. Imajen Tatoli /Egas Cristóvão

DILI, 01 agostu 2023 (TATOLI)–Prezidente Tribunál Rekursu (PTR), Deolindo dos Santos, halo reuniaun ho Prezidente Republika, José Ramos Horta hodi atualiza servisu Tribunál nian.

“Atualiza servisu Tribunál nian ne’ebé mak agora la’o hela ba Prezidente Repúblika. Kestaun dahuluk ne’ebé Xefe Estadu hakarak hatene katak, mais ou menus atu implementa Lei Organizasaun Judisiáriu ne’ebé Parlamentu aprova ona ne’ebé kria Tribunál primeiru instánsia hamutuk 13, nia hatene mós katak daudaun iha prosesu harii pelu menus foun tolu tan, daudaun ita la’o hela ho obra Tribunál Dili nian, entaun nia hakarak hatene bainhira mak obra ne’e hotu no bele uza,” Deolindo dos Santos hateten hafoin reuniaun ho Xefe Estadu, iha Palásiu Prezidensiál, Bairru Pité, tersa ne’e.

Notísia relevante : PN aprova alterasaun lei Organizasaun Judisiária iha finál globál

Nia dehan, prosesu konstrusaun Tribunál Dili nian katak, tuir kontratu obra ne’e tenke ramata iha tinan ida-ne’e, hodi nune’e bele fasilita servisu Tribunál di’ak liután tanba espasu ka fatin ba julgamentu nian iha Tribunál daudaun la sufisiente.

“Previzaun atu entrega obra ne’e iha novembru 2023, no uza ona tanba Tribunál distritál laiha loos kondisaun ona, katak julgamentu loron-loron kuaze juís sira hadau malu fatin,” nia akresenta.

Aleinde ne’e, atualiza ba Xefe Estadu kona-ba konstrusaun Tribunál supremu nian, ne’ebé daudaun ninia progresu iha ona empreza manán-na’in atu halo dezeñu, nune’e tempu badak sei avansa ho asinatura kontratu hodi harii supremu iha tinan hirak mai.

Prosesu dezeñu ne’e sei envolve entidade Estadu hanesan Ajénsia Dezenvolvimentu Nasionál (ADN), Ministériu Obra Públiku (MOP), no Tribunál rasik hodi haree dezeñu ne’e didi’ak tanba ne’e supremu Tribunál.

”Tanba ne’e, supremu Tribunál ne’ebé ekipa ida ha’u rasik mak sei forma ho ha’u-nia desizaun rasik atubele fiskaliza durante empreza ne’ebé manán atu halo dezeñu ne’e bele halo ho didi’ak,” nia tenik.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!