iklan

NASIONÁL, POLÍTIKA

UNMICS rekomenda Governu aselera dekretu-lei fortifikasaun ai-han nutritivu kombate má nutrisaun

UNMICS rekomenda Governu aselera dekretu-lei fortifikasaun ai-han nutritivu kombate má nutrisaun

Diretór Ezekutivu Unidade de Missão para o Combate ao Stunting ka Unidade Misaun ba Kombate Nanizmu ka Stunting (UNMIC), Filipe da Costa, partisipa programa “Entrevista Eskluziva” ho tema “Seguransa Ai-Han no Nutrisaun iha Timor-Leste”, iha estúdiu Tatoli, Faról, segunda (31 jullu 2023). Imajen/Tatoli.

DILI, 01 agostu 2023 (TATOLI)–Diretór Ezekutivu Unidade de Missão para o Combate ao Stunting ka Unidade Misaun ba Kombate Nanizmu ka Stunting (UNMICS), Filipe da Costa, rekomenda ba IX Governu Konstitusionál tenke aselera dekretu-lei fortifiksaun ai-han nutritivu atu bele kombate má natrisaun iha Timor-Leste.

Notísia Relevante: Governu ohin lansa Unidade Misaun Kombate Stunting

“Ida-ne’e IX Governu tenke tau ona importánsia ba asuntu saúde nian. Ba ha’u, importante mak tau prioridade ba ita-nia povu liuliu mak investe iha saúde ho nia moris no matenek,” Filipe da Costa hateten liuhosi programa “Entrevista Eskluziva” ho tema “Seguransa Ai-Han no Nutrisaun iha Timor-Leste”, iha estúdiu Tatoli, Faról, segunda (32 jullu 2023) ne’e.

Iha kontestu má nutrisaun no in-seguransa aihan iha Timor-Leste, iha tinan 2020 MPI 48.3%, stunting 47.1% no wasting 8.6% no IPC iha 36%, hosi ne’e mak kauza má nutrisaun hodi hamosu raes badak (stunting).

Tipu hosi má nutrisaun mak menus nutrisaun hodi hamosu todan isin-lolon nian menus, raes badak no krekas, tipu seluk mak defisiénsia mikronutriente mak hamosu anemia, defisiénsia vitamina A no defisiénsia lodine no tipu seluk mak mais nutrisaun ne’ebé hamosu moris ho todan liu grama 4.000 no obesitas.

“Ida-ne’e akontese tanba fatór sira-ne’ebé kauza má nutrisaun hanesan probreza, ema ne’ebé moris iha liña pobreza nia leten mós afetadu hotu, nune’e hafraku saúde no edukasaun nian. Akontese iha tinan 2020, ki’ak multidimensaun iha 48.3%, iha 22.6% mak menus rendimentu hosi $1.90 loron ida. Agora kona-ba inseguransa ai-han ka ai-han la seguru iha 36%, ho rendimentu la seguru ho ai-han la seguru iha 40%, rendimentu seguru no mós ai-han la seguru 49% inklui feto ho xefe família ba ai-han la seguru iha 46%. Hosi pobreza no inseguransa ai-han akontese tanba kapasidade sosa ai-han la to’o,” nia esplika.

Fatór ne’ebé kontribui ba má nutrisaun mak Timor-Leste nia sanitasaun liga liu ba stunting ka rae badak, mak ema la fase liman 94% bainhira ba soe foer boot ka troka labarik nia popok, no bainhira fó susu ba labarik.

Iha 46% ema la asesu ba sanitasaun no agora sofre ba inseguransa ai-han króniku iha 36%, moderadu 21%, grave iha 15% tanba uma-kain labele sosa hahan nutritivu ho kustu $158,00-$211,00 iha 63%-86%.

“Atu kombate inseguransa ai-han no má natrisaun presiza no tenke avansa ho dekretu-lei kona-ba fortifika seguransa ai-han no ai-han nutritive. Hanoin ona lei ba ai-han sira-ne’ebé mak tama mai, ida-ne’e la’ós kontra merkadu livre maibé atu proteje sidadaun ba ita-nia kompatibilidade saúde ne’ebé iha. Ita rekomenda de’it, ezemplu, mina antes atu distribui tenke fortifika ho vitamina balun, masin mós fortifika lai ho yoda, hanesan foos tenke tau vitamina A, B hodi bele fó saúde di’ak no ai-han nutritivu. Iha Timor-Leste, ita-nia kompañia ACELDA hahú ona fortifika foos ho vitamina. Ida-ne’e hatudu katak setór privadu sira mós bele halo,” nia dehan.

Tanba ne’e, husu mós ba populasaun sira katak parte hotu-hotu hosi sosiedade sivil no parseiru sira atu kontribui nune’e governu bele hetan susesu, se governu susesu mak halo demokrasia bele buras liután, tanba povu mak hili Governu entaun povu sente katak Governu mak salva sira.

Nia husu ba sosiedade sivil no parseiru dezenvolvimentu sira atu apoiu Ggovernu hodi bele susesu hodi komtae má nutrisaun iha Timor-Leste.

“Ba ita-nia povu sira mak presiza ajuda estadu hodi tau matan bai ta-nia saúde rasik. Tanba baibain ema dehan ita-nia rai ne’ebé bokur ho mina, entaun ita hodi bele kuda ai-han iha laran. Ita lapreiza hein ema li’ur mai tein mak ita han nutritivu no kuda ai-han ne’ebé di’ak ba ita-nia saúde. Tanba, ita-nia bei’ala sira uluk di’ak no agora ita bele halo di’ak liután,” nia dehan.

Kona-ba UNMICS

Unidade de Missão para o Combate ao Stunting ka Unidade Misaun ba Kombate Nanizmu ka Stunting (UNMICS), hanesan Unidade foun ida-ne’ebé mak harii bazeia ba Dekretu-Lei Nú. 91/2022, 22 Dezembru, ho objetivu atu Elabora Planu Nasionál ba Kombate Stunting ka Raes Badak, fó ba ezekusaun medida prevista sira-ne’ebé iha.

Kontribui ba informasaun no kampaña ensibilizasaun ba populasaun sira kona-ba kauza no konsekuénsia hosi Nanizmu (raes badak), mobiliza populasaun einjerál hodi bele prevene Nanizmu, apoiu ba tratamentu no mitigasaun Stunting no asegura koordenasaun ho ministériu relevante no parseriu sir aka sosiedade sivíl no servisu administrativu sira kona-ba Stunting no ba má nutrisaun infantíl iha Timor-Leste.

Unidade Misaun Kombate Stunting ne’e nu’udar servisu administrasaun ne’ebé tutela diretamente ba Gabinete primeiru-Ministru, ho autonomia administrativa no autonomia finanseira ne’ebé mak presta apoiu ba Primeiru-Ministru ba iha ezersísiu atribuisaun no kompeténsia sira kona-bá asuntu kombate Stunting.

Diretór Ezekutivu UNMICS aktuál, Filipe da Costa hetan nomeasaun hosi Primeiru-Ministru, Taur Matan Ruak, bazeia ba Despaixu Primeiru-Ministru Nú. 008/PM/II/2023, no daudaun ne’e UNMICS aktualmente lokaliza iha Palásiu Governu, Díli.

Notísia Relevante: UNMICA realiza semináriu sistema ai-haan iha Baucau

Jornalista : Osória Marques

Editór       : Cancio Ximenes

iklan
iklan

Leave a Reply

iklan
error: Content is protected !!