EBF Tobur tama iha lista projetu konstrusaun-reabilitasaun

COVALIMA, 02 agostu 2023 (TATOLI)–Diretór Servisu Edukasaun Covalima, Francelino Freitas Carvalho, hateten Eskola Bázika Filiál Tobur ne’ebé kondisaun grave tama ona lista  ba Projetu Konstrusaun no Reabilitasaun Infraestrutura Edukativa (PKRIE, sigla portugés) atu konstrusaun no reabilitasaun.

Notísia Relevante: Kondisaun Eskola Bázika Filiál Tobur grave

“Ministériu Edukasaun Juventude no Desportu (MEJD) asina kontratu Projetu Konstrusaun no Reabilitasaun Infraestrutura Edukativa (PKRIE) eskola bázika Filiál Tobur, ne’ebé lokaliza iha aldeia Tobur, suku Beco, postu Suai, munisípiu Covalima. Ita-nia grupu sira loke ona konta bankária,” Francelino Freitas Carvalho, hateten ba Agência Tatoli iha nia servisu fatin, Santa Rosa, tersa ne’e.

Loloos PKRIE hahú ona projetu fíziku maibé tanba foin lalais akontese dezastre naturál fó impaktu ba Eskola Bázika Filiál 1.2 Zulo, entaun seidauk hahú maibé iha tempu badak projetu hahú ona.

Servisu Edukasaun Covalima, segunda (01 agostu 2023) ne’e, hamutuk ho Tékniku MEJD forma ona grupu komunitária atu konstrui Eskola Bázika Filiál 1.2 Zulo, ne’ebé lokaliza iha suku Zulo, postu Administrativu Zumalai, munisípiu Covalima.

Tuir dadus, hosi Servisu Edukasaun Covalima projetu konstrusaun no reabilitasaun infraestrutura Edukativa (PKRIE) tinan 2023 hamutuk ualu (8) hanesan Eskola Bázika Filiál Tobur, Eskola Bázika Fohobua, EBF 1,2 Tilomar, Eskola Pre-Eskolár Belulik Kraik, Eskola Pre-Eskolár (EPE) Suai Loro, EPE Ogues, EPE Talioan, EPE Audian no EBF Zulo 1.2 Zulo.

Antes ne’e, Koordenadór Eskola EBF Tobur, João Magno, hateten kondisaun Eskola Bázika Tobur grave, no kona-ba kondisaun asina ona kontratu no loke ona konta bankária maibé to’o ohin loron seidauk hahú projetu fíziku.

Jornalista : Celestina Teles

Editór       : Cancio Ximenes