DILI, 02 agostu 2023 (TATOLI)–Komandante Jerál Polísia Nasionál Timor-Leste (PNTL), Komisáriu Jerál Henrique da Costa apela ba sidadaun hotu atu utiliza rede sosiál hanesan facebook ho loloos.
“Atu apela ba sidadaun hotu, ita labele uza ita-nia rede sosiál tuir ema ida-nia maibé iha ne’ebá tenke hatene katak iha mós ninia limitasaun, ita labele uza hodi ameasa fali ema seluk, ne’e laloos, kuandu tama ona ameasa satán to’o oho, ne’e krime,” Komisáriu Jerál Henrique da Costa hateten hafoin relata situasaun seguransa jerál ba Xefe Estadu, iha Palásiu Prezidensiál, Bairru-Pité, kuarta ne’e.
Henrique afirma, Polísia nafatin buka tuir pesoál sira ne’ebé utiliza plataforma rede sosiál hodi ameasa ema seluk.
“Sidadaun hotu iha direitu, karik Polísia halo buat ruma mak tuir públiku nia haree laloos, sira iha direitu aprezenta ba Tribunál depois ami ba hatán, ami sei la sees hosi lei tanba ita hotu iha lei nia okos. Tanba nu’udar sidadaun prontu atu kolabora,” nia akresenta.
Notísia relevante : Polísia identifika tan na’in ba konta facebook Ela Variana
Iha sorin seluk, nia dehan, Polísia durante ne’e la naran detein ema ida, maibé bazeia ba mandadu detensaun hosi Tribunál.
“Husik públiku halo interpretasaun tanba ema hotu iha direitu halo interpretasaun tuir ida-idak nia hakarak, Polísia mós la’ós tur ba kaer ema narnaran de’it hodi hatama ba sela, tanba iha mandadu detensaun entaun Polísia tenke ezekuta,” nia klarifika.
Bainhira Polísia kumpre ona mandadu detensaun maka ninia prosesu sei lori ba Tribunál hodi deside.
“Kaer sala ema ka lae, ne’e Polísia ezekuta tuir mandadu ne’ebé iha,” Komisáriu Jerál adianta.
Jornalista : Antónia Gusmão
Editora : Julia Chatarina
