iklan

OPINIAUN

Papél mídia promove sidadaun sira-nia direitu asesu no asaun ba informasaun sira

Papél mídia promove sidadaun sira-nia direitu asesu no asaun ba informasaun sira

Hakerek-Na’in Estudante #DCS, #FCS-#UNTL: Francisco Pereira, Angélica da silva, Catarina S.pinto, Febiana da Costa, Izaqueu M. Barbosa, Alexandre S. sarmento, Guerson Freitas Belo, Emeliano Joe da Cunha, Adelia Silvina, Abilio Martins, Miguel Gonçalves (Revizór Teórika)

Introdusaun

Direitu mak hanesan valór ida ne’ebé ema hotu iha no hahú kedas husi moris mai no nia valór universal ne’ebé iha nanis.   Bainhira ko’alia kona-ba direitu ne’ebé relevante ho ema entaun ko’alia kona-ba direitus umanus, maibé ema ida-idak hahú kedas husi moris mai. Liuhusi direitu ema bele hala’o moris tuir liberdade ne’ebé iha. Direitu ka liberdade ba moris, liu-liu direitu ba asesu informasaun ne’ebé fó sai midia tantu eletróniku ho midia imprime.

Iha era globalizasaun ema uza mídia sai hanesan instrumentu importante ida hodi asesu ba informasaun iha mundu inklui iha nasaun Timor-Leste. Nune’e, Mídia hanesan komponente ida ne’ebé sai hanesan pilár ba prosesu fundamentál nian laran hodi dezenvolve relasaun ne’ebé di’ak. Moris iha sékulu 21 ne’e, domina no infiltra iha atividade loroloron nian ho teknolojia ne’ebé avansadu, kompetitivu no dinámika tebes iha setór mídia nian.

Nune’e, ho avansu ne’e mídia asume papél importante ba prosesu dezenvolvimentu nasionál iha estadu direitu demokrátiku, hanesan hatuur iha konstituisaun RDTL iha artigu 40 no 41 katak liberdade imprensa no liberdade ba espresaun. Tanba ne’e, rezultadu monitorizasaun global nian indika katak Global Index  Timor-Leste okupa iha pozisaun X, di’ak liu nasaun sira nivel rejiaun Asean no CPLP nian.

Relasiona ho rezultadu index global ne’e, mídia aleinde fó asesu informasaun nia mós evolui an husi tradisionál ba modern/dijitál (Depari & Mc Andrews, 1978: 45). Mídia nia funsaun atu, informa, eduka, kontrolu sosiál katak liuhusi mídia mak sidadaun bele hetan informasaun sira iha rai-laran no rai-liur iha setór oioin ho kredível. Mídia intermediáriu ba sosiedade hanesan matan, tilun, ibun ba sosiedade.

Mídia nu’udar organizasaun ida ho nia konteúdu mensajen ne’ebé preparadu, importante hanesan ponte relasaun ida iha prosesu mídiasaun ba sosiedade, utiliza hodi halo debate no halo mudansa ba sira-nia aan ángulu perspetiva ba asaun sira mak ligadu ba edukasaun, saúde, agrikultura, ekonomia, kultura, sosiál, jéneru nst (Morissan, 2013).

Realidade ho prosimidade ne’ebé forte, iha Timor-Leste kanál sira antes ne’e konvensionál hahú adota ona ho sistema dijitál ezemplu Rádiu Televizaun Timor-Leste (RTTL,ep), aleinde halo tranzmisaun konvensional, iha tan website, Facebook iha mós Youtube “Media Convergence”. La’ós kanál públika ne’e de’it, hanesan mós ho GMNTV, Diáriu Timor Post, Diáriu Independente, Rádiu Timor Kmanek, rádiu Liberdade, Tatoli,Ip inklui kanál sira seluk ne’ebé la mesiona iha artigu ne’e. Tuir relatóriu Conselho de Imprensa nian, públika iha 2017, katak eziste ona kanál hamutuk 50+ Mídia tranzmisaun 29, mídia imprime 10, no kanál online 6, (CI, 2017:26).

Antes atu diskute kona-ba ajenda-mídia no ajenda-polítiku, hahú husi Teoria Ajenda-Setting. Ahh! Leitór sira, rona, lee, no hatene karik lala’ok saida mak Ajenda-Setting?. Maibé, di’ak liu kontinua lee to’o hotu.

 

Konseitu Ajenda Setting Mídia 

Mídia nia asaun rasik liuhusi planu atividade kobertura jornalista ida-idak mak inisiu hodi aprezenta ba xefe redasaun hafoin aprova no halo kobertura kona-ba asuntu ne’ebé mídia hanoin importante ba públiku ho ajenda públiku viseversa.

Tuir Bernard Cohen katak “The mass mídia may not successful in telling us what to think, but they are stunningly successful in telling us what to think about”, mídia dalaruma la susesu bainhira hato’o ba ita saida mak atu hanoin, maibé konsege tranzmite asuntu ne’ebé halo audiénsia tenke hanoin (Cohen, 1963: 16). Alende ne’e, Rogers mós define Ajenda-Setting hanesan kompetisaun kontínua kona-ba asuntu importante oioin ne’ebé hahú no hetan atensaun husi profisionál mídia, públiku no ukun na’in sira hanesan prosesu linear ne’ebé konstitui husi faze tolu; (1) kolokasaun ajenda mídia define prioridade husi mídia rasik, (2) ajenda mídia influénsia saida mak públiku hanoin (Public agenda), (3) ajenda públika iha interasaun ho saida mak desizór politiku foti no ikus rezulta ajenda polítika, (Dearing, 1988: 95).

Tuir Sarjono mídia iha influénsia liuliu supozisaun ne’e relasiona ho aprende no la muda atetude no opiniaun. Iha asumpsaun báziku rua iha teoria ajenda, hanesan; jornalizmu no meiu komunikasaun sosiál la reflete realidade, maibé filtra no forma asuntu sira. Komunikasaun sosiál oferese tópiku barak no foka liu ba tópiku balu, ne’ebé permite audénsia sira atu determina tópiku sira ne’ebé mak importante liu fali tópiku sira seluk (Fangohoi, 2017).

Haree ba realidade, mídia influénsia sosiedade hodi hamosu opiniaun kona-ba saida mak akontese. Mídia kompostu husi mídia imprensa: Jornál, revsita,brosura, mídia elektrónika; Rádio,televizaun no mídia online (Ardianto, 2018:40).Embora iha mídia eletróniku maka televizaun hola parte ona iha moris ema nian, priense nesesidade interasaun iha sosiedade.

Observa kona-ba mídia nia divulgasaun informasaun ba iha públiku kona-ba asuntu ne’ebé importante hodi konstrui persepsaun  hafoin transforma ba opiniaun públika, ema hotu bele uza hanesan  reférensia linear ho nia funsaun tolu (Littlejohn, Stphen W.2002): (1) Ajenda mídia sai hanesan representa ida ne’ebé  reflete ba interese públiku, (2) ajenda mídia nu’udar kestaun similaridade husi  asuntu  públiku nian, (3) mídia ho nia konteúdu informasaun influénsia públiku.

Haree ba realidade empirika iha Timor-Leste audensia ativu tebes ba públikasaun notisia iha mídia sira, haree liu ba notisia ne’ebé ko’alia kona-ba asuntu saúde, edukasaun, infrestrutura no ekonomia. Liuhusi notisia ne’ebé foti hanesan amostra relasiona ho ideia mensiona iha leten;

(1)” Fós hotu estudante “kost”, Gil laran-metin ba viziñu” Naunil Média (16/03/2021). Liuhusi faktu ida-ne’e konvense audiénsia sira hodi muda sira-nia hanoin sosiál halo asaun karidade ba estudante sira iha momentu ne’ebá.

(2)“Fernanda Lay eleitu ba Prezidente Parlamentu Nasionál”, públika husi Timor Post (22/06/2023), totál views 2,118. Publikasaun ne’e bele hafanun inteletuál sira-nia hanoin bele afavór liu desizaun sira, no promove liután asuntu jéneru iha sosiedade, liuliu oportunidade hanesan entre feto ho mane.

(3)“Empreza distribuidora:”AIFAESA la iha teste laboratóriu ba fós Manu Vitoria” públika husi Tatoli (09/07/2023). Publika husi Tatoli, bele promove públiku nia hanoin kona-ba asuntu ne’e no iha nivel polítika inklui nonpolítika sira bele halo dezisaun ruma.

Bazeia ba hanoin hirak iha leten mídia tau atensaun ba problema sira-ne’ebé sosiedade preokupa ho atualidade. Relasiona ho dezafiu sira, bele konsidera hanesan oportunidade ba meiu konvensionál sira atu dezenvolve an ho kritiku liután, iha sentidu funsionamentu redasaun mídia nian liuhusi ajenda-mídia nian.

Ajenda mídia ho ajenda públika vs ajenda polítika

Ajenda mídia hanesan asaun rasik, liuhusi planu atividade kobertura jornalista idaidak nian.  Inisiu hodi aprezenta ba xefe redasaun hafoin aprova no halo kobertura kona-ba asuntu ne’ebé mídia hanoin importante ba públiku ho ajenda públiku viseversa. Nune’e, ajenda mídia katak, ajenda mídia bele haree husi aspetu ne’ebé koko hatada-an husi kobertura mídia nian (McCombs ho Shaw, 2019). Tanba ne’e, sira-nia pozisaun kobertura notisia hanesan fatór ne’ebé hahú husi redasaun mídia.

Haree ba ajenda mídia nian influénsia no interasaun ho ajenda públiku no oinsá ajenda públiku nia konsentrasaun kona-ba asuntu polítika, ekonomia, edukasaun, saúde, social, kultura sira. Atu aprezenta hanesan asuntu importante liu asuntu sira seluk. Informasaun sira bele sai konsumu prinsipál no hamosu iha diskusaun sira tantu públiku no sosiedade rasik. Tuir Reese katak ajenda públika mak rezultadu husi presaun ne’ebé mai-husi li’ur no laran ka mídiu rasik. Bazeia ba kombinasaun programa internu, desizaun editorial no jestaun mós (Morrisan 2013: 499). Mídia iha efeitu boot tebes no forte, liu tanba supozisaun ida-ne’e hodi hamosu opiniaun ruma iha pensamentu ema idak-idak nian.

MCLuhan (1998) ajenda polítiku katak nesesidade informasaun ne’ebé públiku hetan liuliu fó influénsia ba polítiku sira hodi hola desizaun ruma. Tanba ne’e sekuénsia husi asuntu ida bele kontribui ba muda situasaun ruma tantu iha nivél polítiku nomós naun-polítiku. Refleta ba publikasaun ne’ebé sita; ezemplu ida, iha inisiu pandemia estudante laran metin ba viziñu, bele hamosu diskusaun públiku nian no influénsia dezisaun ruma iha nivel polítiku hanesan implementa programa apoiu umanitáriu ba estudante sira tantu husi Governu no NGO no ajénsia sira.

Konkluzaun

Mídia tranzmite informasaun ba sidadaun ne’ebé lian laek, minoritáriu, elite-polítiku, nonpolítiku sira, liuhusi meiu oi-oin, hanesan televizaun, rádiu, jornál, online inklui mídia sosiál. Informasaun sira bele hariku audiénsia nia koñesimentu no atualiza faktu husi akontesimentu ne’ebé iha valór prosimidade katak akontese besik ba audiénsia hanesan timoroan ida mós iha sosiedade.

Refleta ba ajenda setting haforma debate polítiku hodi determina asuntu sira. Ida-ne’e mídia hanesan entidade prinsipál ne’ebé hili istória notísia prioritiza ba saida mak sira hanoin, presiza iha dezisaun ruma no asaun relevante sira.

Liuhusi artigu ne’e autór sira hakarak destake katak (1) Mídia nafatin uza poder independénsia, hodi sai matan tilun, no ibun ba lian laek sira. (2) Públiku informasaun sira-ne’ebé asesu bele uza ho loloos kontribui ba muda asaun ruma iha sosiedade, (4) Asesu mós mídia privadu no mídia públiku. Obrigadu.

 

Referénsia

Conselho de Imprensa (2017). Relatóriu Anuál 2016, Díli: CI

Bernard, C. Cohen (1963). The press and policy, America: Princeton University.

Depari, E., & Mc Andrew, C., (1991). Peranan Komunikasi Massa Dalam Pembangunan, Yogyakarta: Gadjah Mada University

Fangohoi, L. Sugiyanto, Sukesi, K. (2017). The role of cyber extension as media information of Plantation genetic resources in the insurance of cocoa, Malang East Java:   University Brawijaya, Vol.5 (Iss.11): November, 2017], ISSN- 2350-0530(O), ISSN- 2394-3629(P)

Gonçalves, M. (2021), Teoria ajenda setting mídia ho influénsia ba mudansa, https://tatoli.tl/2021/07/02 /teoria-ajenda-setting-midia-ho -influensia-ba-mudansa/,  asesu iha loron 12/07/2023.

Guterres Vergilio (2017) Liberdade Imprensa Espresaun nu’udar responsabilidade Istórika, https://tatoli.tl/2017/05/09/liberdade-imprensa-espresaun-nuudar-responsabilidade-istorika/,asesu iha loron Sexta,07/07/2023.

 

Mccombs, M. (2019). The Agenda Setting Function of Mass Media, Nort California: University of Texas at Austin.

McCombs, M. E & Donald L. Shaw (1972), The Agenda-Setting Function of Mass Media The Public Opinion Quarterly Published By: Oxford University Press Vol. 36, No. 2 (Summer, 1972), pp. 176-187 (12 pages) https://www.jstor.org/stable/2747787,asesu iha loron Kuarta /12/07/23.

 

Morissan (2013), Teori Komunikasi Massa, Bogor: Penerbit Ghalia Indonesia.

Maxwell  McCombs &Donal Shaw (1972).Agenda setting, https://glints.com/id/lowongan/agenda-setting-adlah/Y5wK6LcWeSU. asesu iha loron Kinta, 6/07/2023.

 

 

iklan
iklan

Leave a Reply

iklan
error: Content is protected !!