iklan

NASIONÁL, HEADLINE, POLÍTIKA

PM Austrália Anthony Albanese felisita Xanana Gusmão

PM Austrália Anthony Albanese felisita Xanana Gusmão

Bandeira Austrália no Timor-Leste. Imajen/Espesiál

DILI, 02 agostu 2023 (TATOLI)–Primeiru-Ministru (PM) Austrália, Anthony Albanese, halo kontaktu direita via telefónika, iha Palásiu Governu, kuarta dadeer ne’e, ho Primeiru-Ministru, Kay Rala Xanana Gusmão, no iha tempu hanesan felisita no dezeja susesu iha governasaun.

“Apresia eleisaun parlamentár tinan ne’e la’o ho ambiente demokrasia no pás hodi povu fó fiar ba formasaun IX Governu,” Xefe Governu australianu louva.

Anthony Albanese iha esperansa boot atu servisu hamutuk ho IX Governu Konstitusionál iha tempu oin mai.

Notísia relevante : Ministra Penny Wong no Xanana hasoru malu reafirma kooperasaun bilaterál

Biban ne’e, Xefe Governu país rua komprometidu servisu hamutuk tanba konsidera ne’e hanesan era foun iha relasaun entre país rua.

Iha konversa amizade ne’e, PM Austrália konvida PM Xanana atu hala’o vizita bá Austrália iha tinan oin hodi diskute no hametin liután kooperasaun bilaterál entre rai rua. Nune’e, Xanana mós konvida Xefe Governu australianu atu vizita mós Timor-Leste.

Iha semana dahuluk mandatu IX Governu Konstitusional, Primeiru-Ministru Xanana simu vizita hosi Ministra Negósiu Estranjeiru Austrália, Senadora Penny Wong, hodi diskute no hametin kooperasaun bilaterál no apoia dezenvolvimentu infraestrutura iha Timor-Leste.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!