VIQUEQUE, 02 agostu 2023 (TATOLI)—Polísia Nasionál Timor-Leste (PNTL) munisípiu Viqueque liuhosi Unidade Tránzitu rekolla koima infrasaun rodaviária $363 durante fulan-jullu.
“Ami halo atividade operasaun check point ba transporte sira ne’ebé halo movimentu iha kapitál munisípiu Viqueque, ne’ebé hetan infrasaun kontra regra seguransa rodoviária, nune’e ami aplika motorista sira tenke selu koima bazeia ba regra, durante fulan-jullu ne’e ami konsege rekolla taxa hamutuk $363 maka hatama ba kofre Estadu,” Komandante PNTL Viqueque, Supertendente João da Costa, informa iha ninia knaar fatin, Beskem, kuarta ne’e.
Notísia relevante : PNTL Viqueque rekolla koima $12.417
Atividade operasaun seguransa ba rodoviária durante ne’e hala’o iha kapitál Viqueque inklui postu administrativu lima atu tau matan ba movimentu transporte hodi halo prevensaun ba asidente tráfiku sira.
“Ba oin ami sei kontinua hala’o operasaun check point no ami halo sosializasaun ba motorista sira tantu karreta no motorizada, atu nune’e motorista sira bele hatene regra rodoviária nian,” nia akresenta.
Biban ne’e, nia husu ba abitante munisípiu Viqueque ne’ebé uza motorizada no karreta atu koopera ho parte seguransa hodi kumpre regra bainhira halo viajen hosi kapitál Viqueque, postu no munisípiu seluk.
“Bainhira halo viajen, motorista motorizada sira tenke uza kapasete no lori dokumentu transporte ne’ebé orijinál,” nia akresenta.
Tuir dadus hosi PNTL munisípiu Viqueque, durante check point konsege halo apreensaun motorizada unidade 10 tanba dokumentu laiha.
Parte Polísia rejista asidente tráfiku rua hanesan, motorizada soke malu no ida seluk motorizada soke hale-hun hodi rezulta motorista lakon vida iha postu administrativu Uatulari.
Jornalista : Vitorino Lopes da Costa
Editora : Julia Chatarina
