Trimestre daruak 2023, Aduaneira Oé-Cusse hetan reseita rihun $121-resin
OÉ-CUSSE, 02 agostu 2023 (TATOLI) – Diretór Autoridade Aduáneira (AA/Alfándega), Rejiaun Administrativa Espesiál Oé-Cusse Ambeno (RAEOA), José da Costa, informa, iha trimestre daruak tinan 2023 ne’e servisu Alfandega Oé-Cusse kontribui reseita ba kofre Estadu hamutuk $121,959.63, mai hosi fonte importasaun.
“Servisu kontrola sasán importasaun no esportasaun inklui sasán kontra bandu sira, ikus mai ita rekolla reseita iha trimestre segundu hamutuk $121,959.63, tan ne’e iha trimestre primeiru ho segundu hamutuk $320,600.13,” José da Costa, ba jornalista sira iha Oé-Cusse, kuarta ne’e.
Notísia relevante: Tinan 2022, Alfándega RAEOA rekolla reseita rihun $239-resin
José da Costa, esplika, iha fulan abríl konsege rekolla $36,784.13, iha fulan maiu tun ba $33,264.00 no iha fulan juñu sa’e ba $51,911.50.
Nune’e nia agradese tanba situasaun normál ona kompara ho tempu COVID-19, afeta maka’as ba reseita Estadu liu-liu servisu alfandega nian, no taxa sira-ne’e hetan barakliu mai hosi sasán importsaun de’it, la inklui portu no airoportu só importasaun liuhosi fronteira terrestre odamatan ida de’it liuhosi fronteira Sakato.
Notísia relevante: Serka sanitária, reseita Autoridade Aduaneira RAEOA menus kuaze 80%
Maibé ba fronteira Oésilo Pássabe no Nítibe desde COVID-19 la ativa tanba kondisaun dalan, maibé funsionáriu hosi Alfandega kontinua hala’o servisu hanesan babain hamutuk ho Polísia Unidade Fronteira (UPF) sira.
“Agora reseita ne’e iha progresu di’ak, sei ita kompara ho 2022 ba kotuk, menús agora foin trimetre daruak taxa ne’e haksoit itoan, ne’e hatudu tanba ita nia nasaun iha situasaun normál lahanesan uluk iha situasaun Covid-19 afeta maka’as,” nia katak.
José da Costa, agradese ba komunidade tanba kontribui tebes iha prosesu importasaun, tanba Estadu Timor-Leste bandu maka’as ba importasaun kroat, hanesan kilat droga no selu tán.
“Grasa deus tanba desde ita hala’o servisu iha Oé-Cusse, buat sira-ne’e laiha, ida-ne’e orgullu bo’ot mai ita tanba ita-nia komunidade kontribui atu prevene sasán bandu labele importa hosi rai seluk tama mai ita-nia rai,” nia tenik.
Notísia relevante: Alfándega Oé-Cusse presiza laboratóriu kona-bá teste produtu importasaun
Jornalista: Abílio Elo Nini
Editor: Evaristo Soares Martins
