DILI, 02 agostu 2023 (TATOLI)—Komandante Jerál Polísia Nasionál Timor-Leste (PNTL), Komisáriu Jerál Henrique da Costa, kuarta ne’e, halo enkontru semanál ho Prezidente Repúblika (PR), José Ramos Horta, ne’ebé iha biban ne’e Xefe Estadu husu Komandu atu reforsa seguransa iha fronteira.
“Ha’u mai relata situasaun seguransa iha rai-laran no progresu servisu Polísia ba Prezidente Repúblika, iha ne’e Prezidente husu atu reforsa ita-nia seguransa fronteira hodi halo kontrolu ba atividade ilegál sira, maski hasoru difikuldade oin-oin,” Komisáriu Jerál Henrique da Costa, hateten hafoin relata situasaun jerál ba PR Horta, iha Palásiu Prezidensiál, Bairru-Pité, kuarta ne’e.
Notísia relevante : Komandu PNTL reforsa seguransa iha fronteira
Ligadu ho pedidu ne’e, Komandante Jerál dehan, Polísia prontu kualker oras hodi fó seguransa iha fronteira, maski daudaun hasoru difikuldade hanesan transporte, menus rekursu, fasilidade hanesan rádiu komunikasaun, no distánsia postu dook.
“Ida-ne’e dala ruma ema lori sasán kontra no bandu ne’e tama sai, dala ruma sira liu hosi fatin ne’ebé Polísia la kobre, ho limitasaun ne’ebé iha, ami nafatin halo esforsu hodi fó atendimentu,” nia akresenta.
Tanba ne’e, Prezidente Repúblika husu ba PNTL atu servisu ho profisionál maski mosu situasaun ruma no labele lakon vontade servisu, maibé ho limitasaun, tenke hatudu nafatin katak membru Polísia sira prontu atu asegura seguransa ba nasaun no povu.
Aleinde ne’e, Komisáriu Jerál relata mós katak situasaun seguransa iha territóriu nasionál la’o di’ak no hakmatek. Membru PNTL no unidade sira iha territóriu kontinua halo servisu maka’as.
Jornalista : Antónia Gusmão
Editora : Julia Chatarina
