DILI, 03 agostu 2023 (TATOLI)—International Finance Coorporation (IFC) sujere ba Governu Timor-Leste atu kontinua konsentra ba prosesu dezenvolvimentu infraestrutura bázika sira iha rai-laran hodi fó asessibilidade ba povu.
“Presiza mós halo reforma ba setór privadu sira hodi sai forte liután atubele partisipa ativu liután iha prosesu dezenvolvimentu nasionál. Ne’ebé IFC prontu atu halo saida de’it, nune’e bele lori progresu dezenvolvimentu ekonomia mai Timor-Leste,” IFC Regional Manager, Paramita Dagupta, hateten, bainhira dada-lia ho Vise Primeiru-Ministru (PM), Ministru Koordenador ba asuntu Ekonómiku, no Ministru Turizmu no Ambiente, Francisco Kalbuadi Lay, iha Gabinete Ministériu Turizmu no Ambiente, iha Farol, kinta ne’e.
IFC nu’udar instituisaun finanseira internasionál ne’ebé oferese servisu investimentu, konsultória no jestaun ativu hodi insentiva dezenvolvimentu setór privadu iha nasaun menus dezenvolvimentu sira hanesan Timor-Leste.
IFC mós nu’udar membru Grupu Banku Mundiál ho nia kuartel jerál iha Washington, D.C., iha Estadu Unidu Amérika.
Notísia relevante : IFC-PR diskute perspetiva dezenvolvimentu Timor-Leste ba tinan lima mai
Organizasaun ne’e hahú tama Timor-Leste iha tinan 2004, ne’ebé hare liu ba dezenvolvimentu setór privadu sira iha rai-laran.
Biban ne’e, IFC aprezenta kona-ba saida mak sira halo ona durante ne’e iha Timor-Leste, no hakarak mós atualiza kona-ba saida mak sira bele halo tan iha rai-laran, liu-liu iha governasaun atuál.
Nune’e, IFC sei fó prioridade ba setor tolu ne’ebé importante hanesan reforma setor privadu, prioritiza ba programa dezenvolvimentu inklui dezenvolvimentu infraestrutura bázika.
Iha Biban hanesan, Ministru Francisco Kalbuadi Lay simu vizita delegasaun IFC ne’e ho laran ksolok tebes.
“Agradese ba IFC nia programa Parseria Públiku Privada (PPP) ne’ebé hala’o ona iha Timor-Leste hanesan iha Aeroportu, Portu Tibar, no projetu sira seluk ne’ebé halo ona ho TradeInvest, Servisu Rejistu no Verifikasaun Emprezariál, Institutu Públiku (SERVE, I.P), no setór sira seluk,” governante ne’e akresenta.
Ekipa IFC ne’ebé hasoru malu ho Vise PM, lidera hosi IFC Regional Manager, Paramita Dagupta, IFC Resident Representative, David freedman, Senior Operation Officer, Lan Van Nguyen no Dario Quarantana, inklui Leila Martins no Rita Pires nu’udar Operation Officer.
Jornalista : Antónia Gusmão
Editora : Julia Chatarina
