VIQUEQUE, 03 agostu 2023 (TATOLI)—Grupu responsável hahú halo preparasaun ba implementasaun projetu komunitáriu hodi reabilitasaun no harii infraestrutura eskola hamutuk 11 iha Viqueque.
“Projetu komunitáriu ne’e tanba daudaun tama tranzisaun governasaun, tanba ne’e maka la’o tarde. Se la’ós tranzisaun governasaun karik la to’o tinan 2024 ita bele implementa ona projetu sira ne’ebé atu implementa iha munisípiu Viqueque. Nune’e agora depende ba Ministra agora nian,” Diretór Servisu Edukasaun Viqueque, Domingos Brandão, informa ba Agência Tatoli, iha ninia knaar fatin, Beloi, kinta ne’e.
Antes ne’e, grupu responsável projetu loke ona konta bankária ba projetu komunitáriu, nune’e hein aseitasaun orsamentu no desizaun hosi Ministériu Edukasaun.
“Kestaun ne’e desizaun Ministra nian, karik Ministra aseita bele kontinua implementa projetu komunitáriu, entaun bele transfere orsamentu ba konta bankária grupu hodi ita-nia grupu sira uza reabilita no harii infraestrutura eskola sira. Ha’u sente projetu komunitáriu ne’e pertinente tebes tanba eskola sira ne’ebé ami identifika no hatama ba projetu komunitáriu kuaze ho kondisaun grave,” nia akresenta.
Notísia relevante : MEJD inaugura projetu komunitáriu eskola 12 iha Viqueque
Kondisaun eskola 11 daudaun ne’e a’at kuaze tinan barak maibé seidauk hadi’a, nune’e Servisu Edukasaun hatama ona ba iha projetu komunitáriu.
“Ita tau komunidade ne’ebé hela besik areadór eskola maka sai responsável ba projetu komunitáriu hodi halo konstrusaun, nune’e ami-nia tékniku sira hosi edukasaun maka ba halo akompañamentu prosesu, maibé ninia orsamentu maka seidauk prevee,” nia akresenta.
Tuir dadus, eskola 11 ne’ebé tama projetu komunitáriu mak hanesan Eskola Ensinu Báziku Filiál (EBF) Loco-Loco lokaliza iha área rurál suku Matahoi postu Uatulari, EBF Komu-Oli, EBF Uaibua Ossu, EBF Villa Nova Bahalara Uain postu Viqueque Vila, EBF Kai-rua Lacluta, EBF Rame Ana Ossu, EBF Uma Tolu Lacluta, EBF Iraler Uatulari, EBF Osokaiua Uatulari, EBF Afaloikai Uatulari no Eskola Tékniku Kalo Heda Uatulari ne’ebé atu harii morru haleu eskola.
Munisípiu Viqueque iha tinan 2023 hetan projetu komunitáriu ba konstrusaun no reabiitasaun infraestrutura eskola hamutuk 21.
Jornalista : Vitorino Lopes da Costa
Editora : Julia Chatarina
