VIQUEQUE, 03 agostu 2023 (TATOLI)—Organizasaun lokál K’nua Haberan Komunidade (KHK) iha munisípiu Viqueque durante ne’e fó apoia orsamentu no formasaun ba grupu kiik sira hodi hakbiit ekonomia família no planeia tinan ne’e bele reforsa grupu sai kooperativa.
“Durante ezisténsia organizasaun iha munisípiu Viqueque, ami ho programa hakbiit ekonomia fó apoia fundu no organiza grupu sira kria ortikultura. Ami konsege estabelese ona grupu hamutuk 67 ne’ebé mai hosi família vulnerável, hafoin ami monitoriza no identifika iha grupu 25 maka daudaun progresu la’o di’ak, halo atividade rai no empresta osan inklui ortikultura. Nune’e, ba oin ami hakarak serbisu hamutuk ho Governu hodi halo planu ida reforsa grupu sira-ne’e hodi transforma sai kooperativa,” Diretór KHK, Agosto Pinto, informa ba Agência Tatoli, iha ninia knaar fatin, Beobe, postu Viqueque Vila, kinta ne’e.
Notísia relevante : KHK halo konservasaun bee-matan antigu We kiar-oan iha suku Uma-kiik
KHC transforma ona grupu lima iha suku Uma-Kiik, postu Viqueque Vila sai kooperativa no sei esforsu fó kapasitasaun ba grupu sira hodi hasa’e koñesimentu molok transforma ba kooperativa.
“Ami mós sei kontinua akompaña grupu sira ne’ebé hasoru dezafiu, ami sei fó kapasitasaun kona-ba rai osan, fó osan ba ema kréditu, inklui fahe osan funan sira,” nia akresenta.
Diretór ne’e relata, KHK apoia grupu hamutuk 27 ho fundu $1.000, nu’udar kapitál inklui distribui fini hodi grupu sira kuda hodi kria ortikultura. Nune’e mós apoia materiál ortikultura inklui kapasitasaun ba grupu 40.
“Ami serbisu hamutuk ho parseiru Caritas Australália no Catholic Relief Services (CRS) hodi apoia ita-nia família vulnerável sira ne’ebé iha postu haat hanesan Viqueque Vila, Lacluta, Ossu no Uatulari,” nia adianta.
Jornalista : Vitorino Lopes da Costa
Editora : Julia Chatarina
