VIQUEQUE, 01 agostu 2022 (TATOLI)—Organizasaun Naun Governamentál (ONG), K’nua Haberan Komunidade (KHK) Viqueque ho inisiativa rasik halo konservasaun kuda ai-oan iha bee-matan antigu We kiar-oan, iha aldeia Bahafu, suku Uma-kiik, postu Viqueque vila, munisípiu Viqueque.
“Ami halo konservasaun ba bee-matan We kiar-oan hamutuk ho komunidade iha suku Uma-kiik maka ba kuda ai-oan no hamos bee-matan, hodi halo konservasaun iha suku Uma-kiik nune’e komunidade sira bele uza nafatin bee,” Diretór Ezekutivu KHK Viqueque, Agusto Pinto, hateten ba Agência Tatoli, via telefónika, iha segunda ne’e.
Notísia relevante: Ema deskoñesidu taka bee-matan iha Luihunu Viqueque
Objetivu konservasaun atubele eduka komunidade bele proteje ba bee-matan antigu sira, nune’e bele utiliza filafali no proteje hodi labele maran iha tempu bailoron naruk.
“Durante ne’e ami haree komunidade hosi aldeia Bahafu uza bee-matan We kiar-oan, ne’ebé bainhira tama ba tempu bailoron nian maran no bele difikulta komunidade,” nia akresenta.
Komunidade hosi aldeia Bahafu hamutuk uma-kain 40 resin maka uza bee-matan antigu ne’e durante tinan barak ona no to’o agora komunidade seidauk asesu bee sira ne’ebé distribui hosi Agua Saneamentu munsípiu Viqueque no Bee Timor Leste, Empreza Públika (BTL, E.P).
“Bee ne’e importante ba ema hotu, tanba ita uza ba nesidade loron-loron nian. Tanba ne’e, ami sei kontinua halo identifikasaun ba bee-matan antigu iha munisípiu Viqueque hodi halo konservasaun. Hanesan agora ami halo konservasaun bee-matan We Kiar-oan hodi komunidade uza tein, konsumu, haris no uza ba atividade ortikultura hanesan kuda modo no seluk tan,” nia tenik.
Iha konservasaun, KHK serbisu hamutuk Catholic Relief Services (CRS) no hetan apoiu ai-oan 500 resin hosi Ministériu Agrikultura no Peska (MAP) munisípiu Viqueque hodi kuda iha bee-matan.
ONG ne’e halo mós kolaborasaun ho komunidade hosi suku Uma-kiik hodi kuda ai-oan no hamoos bee-matan hodi komunidade bele uza nafatin iha tempu naruk.
Jornalista : Vitorino Lopes da Costa
Editora : Julia Chatarina
