iklan

EKONOMIA, HEADLINE, OEKUSI

PA RAEOA xamada kompañia rua loron 60 tenke finaliza estrada rurál Pássabe

PA RAEOA xamada kompañia rua loron 60 tenke finaliza estrada rurál Pássabe

PA RAEOA xamada kompañia rua, iha loron 60 tenke finaliza reabilitasaun estrada rurál iha sub-rejiaun Pásabe. Imajen Tatoli/Abílio Elo Nini.

OÉ-CUSSE 03 agostu 2023 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, fo xamada atensaun ba kompañia CP Unipesoál Lda ho kompania Asistono Unipesoál Lda, ba fulan rua ka loron 60 tenke konklui projetu reabilitasaun estrada rurál iha sub-rejiaun Pássabe, tanba kuaze tinan rua ona hahú hosi 2021 to’o ohin loron progresu foin atinje de’it 18%. 

“Iha projetu rua mak tenke obriga halo tuir termu kontratu, ida seluk maka fronteira suku Malelat ho Abani, kompañia Asistono mak halo, ida seluk projetu Malelat kompañia CP halo hosi ending lote 3 ne’e ba to’o Kusi suku Ban-Afi, ne’e seidauk hotu, ita fó tempu fulan rua, sira la halo hotu iha loron 60 nia laran, ita sei termina kontratu, ita halo fali koutasaun ka tenderizasaun ba kompañia seluk atu hala’o,” Arsénio Paixão Bano ba Tatoli, hafoin halo fiskalizasaun iha suku Abani sub-rejiaun Pássabe, kuarta ne’e.

Notísia relevante: RAEOA aloka millaun $4-resin ba projetu manutensaun-reabilitasaun estrada rurál

Ezekutivu ne’e, informa, xamada atensaun ba kompañia rua ne’e, hala’o ona liuhosi enkontru ho Obra Públika, atensaun fó daudaun ona, tan ne’e sira tenke haka’as-an tanba foin atinje 18% maibé servisu besik tinan ida ona, sei la kontinua laiha solusaun seluk,

Hanesan mós kompañia CP, nia halo ona besik tinan rua ona, maibé sedauk hotu, sei sira la kumpri iha fulan rua nia laran, autoridade termina kontratu, agora autoridade termina kontratu ba kompañia bo’ot sira halo vila ZEESM ho Otél Oé-Upun, tanba saida mak ida-ne’e ita labele halo.

“Maibé ita halo koordenasaun uluk ho sira, fó atensaun haree sira-nia justifikasaun saida, maibé  sei sira la kumpri iha fulan rua nia laran, autoridade sei termina kontratu” nia promete.

Purtantu, durante fiskalizasaun ne’e parte kompañia rua mós marka prezensa, no konsege dadalia ho prezensa Prezidente Autoridade no promete sei submete justifikasaun hodi halo kontinuasaun.

Entretantu, Kompañia CP Unipeso’al Lda reabilitasaun estrada rurál hahú hosi bairru Kusi aldeia Hau-Tefo suku Ban-Afi sub-rejiaun Nítibe liga ba suku Malelat sub-rejiaun Pássabe ho valór kontratu hamutuk $784,814.50.

Nune’e kompañia Asistono Unipesoál Lda, reabilita estrada rurál iha suku Abani sub-rejiaun Pássabe hahú hosi Pássabe vila to’o aldeia Haemnanu kilometru tolu (3) ho valór kontratu $296,252.36.

Kompañia rua ne’e ezekuta obra sira mak hanesan, reabilita estrada, drainajén, bee-dalan, ateru, no plant-konkrit maibé progresu foin atije 18%, maske projetu ne’e ezekuta desde 2021 to’o agora.

Notísia relevante: RAEOA aloka millaun $1-resin manutensaun estrada no ponte sub-rejiaun tolu

Jornalista: Abílio Elo Nini

Editor: Evaristo Soares Martins

iklan
iklan

Leave a Reply

iklan
error: Content is protected !!