iklan

NASIONÁL, HEADLINE, POLÍTIKA

PM Xanana husu líder membru ASEAN fó solusaun ba problema Myanmar

PM Xanana husu líder membru ASEAN fó solusaun ba problema Myanmar

Primeiru Ministru, Kay Rala Xanana Gusmão. Imajen Tatoli/Egas Cristóvão

DILI, 03 agostu 2023 (TATOLI)Primeiru-Ministru (PM), Kay Rala Xanana Gusmão husu líder membru Asosiasaun Nasaun Sudeste Aziátiku (ASEAN, sigla inglés) atu hamutuk fó solusaun ba junta militár ne’ebé mosu iha Myanmar.

Antes ne’e, Xanana hasoru ona Sekretáriu Jerál Nasaun Unida (ONU), António Guterres hodi informa pozisaun Timor-Leste nian katak kondena maka’as junta militár ne’ebé akontese iha Myanmar.

“Timor-Leste nia pozisaun ba ASEAN maka ida ne’e, ha’u nu’udar Primeiru-Ministru, Timor-Leste sei la tama ASEAN, bainhira asosiasaun laiha kbiit atu konvense junta militár. Ida-ne’e pozisaun Timor-Leste nian, hanesan mós pozisaun Sekretáriu Jerál ONU, António Guterres nian,” Xanana hateten hafoin ramata enkontru semanál ho Prezidente Repúblika, José Ramos Horta, iha Palásiu Prezidensiál, Bairru-Pité, kinta ne’e.

Notísia relevante : PR Horta-Ministru Estranjeiru Singapura diskute TL adere ba ASEAN

Timor-Leste adopta prinsípiu demokrátiku anti rejime militár iha mundu no hola parte nu’udar nasaun membru Komunidade País ho lian Portugés (CPLP, sigla portugés) inklui sai membru observadór iha ASEAN, durante ne’e moris iha toleránsia no dame, tanba ne’e la permite atu mosu bebeik violasaun direitu umanu iha Myanmar.

“Ita país demokrasia, agora ita ba permite fali junta militár iha ne’ebá. Kondisaun mak ida-ne’e, ita buka mezmu ho problema iha ita-nia rain rasik, ho violasaun mosu maibé laiha golpe Estadu no respeita ba malu. Eleisaun Prezidensiál no Parlamentár ita hatudu ba mundu katak ita iha kultura demokrátika iha ita-nia ulun, ita la baku malu, hirus malu no la oho malu,” PM akresenta.

Xefe Ezekutivu dehan, líder nasaun membru ASEAN tenke tuur hamutuk hodi hakotu konflitu iha Myanmar, ne’ebé nu’udar país membru asosiasaun.

“Sé ASEAN laiha kbiit atu konvense junta militár iha Myanmar, entaun ha’u bele dehan Timor-Leste sei la fiar asosiasaun ne’e, ida-ne’e pozisaun Governu nian. Ita ezije ba rai sira iha ASEAN atu tuur hamutuk no tau-matan ba kestaun direitu umanu no líder Aung San Suu Kyi ne’ebé iha hela komarka,” Eis Prezidente Repúblika ne’e tenik.

Xanana subliña, maski Timor-Leste foin ukun-an, maibé hola parte nu’udar nasaun membru g7+ hodi halibur nasaun frajil no afetadu hosi konflitu bele servisu hamutuk atu hadi’a povu no nasaun hakat ba dezenvolvimentu.

Entretantu, ONU rasik ezije ba militár sira atu liberta prizioneiru polítiku hanesan líder eleitu eleisaun, Aung San Suu Kyi no hakotu ona violénsia ba ema ne’ebé halo manifestasaun pasífiku.

Myanmar hasoru krize polítika no umanidade hafoin militár halo golpe iha fevereiru 2021.

Junta militár akuza partidu vensedór, Liga Demokrasia Nasionál (NLD) halo fraude durante votasaun iha novemrbru 2020 to’o mosu junta militár, hodi deteim Prezidente Partidu NLD, Aung San Suu Kyi no halo populasaun sivíl barak maka mate.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!