DILI, 03 agostu 2023 (TATOLI)–Primeiru-Ministru (PM), Kay Rala Xanana Gusmão, defende katak, timor-oan sira ne’ebé ba servisu ka estuda iha rai-li’ur, bainhira mate tanba moras ka asidente tenke lori fila mai ninia rain.
“Timor-oan sira ne’ebé mate iha rai-li’ur ita buka atu lori mai, tanba sira timor-oan,” Xanana hateten hafoin ramata enkontru semanál ho Prezidente Repúblika, José Ramos Horta, iha Palásiu Prezidensiál, Bairru-Pité, kinta ne’e.
Notísia relevante : Traballadór na’in-rua mate iha Koreia Súl sees ona hosi sistema
Xanana konta katak, iha kazu timor-oan ne’ebé inan-aman entrega ba madre sira hosi Filipina desde idade tinan-haat, nune’e madre sira lori ba eskola iha Filipina to’o hasai kursu mestradu enjeñaria, maibé tanba moras mate.
“Momentu madre sira hateten ba ha’u bainhira ha’u seidauk sai Primeiru-Ministru, ne’ebé tanba madre sira laiha esperiénsia hodi trata hodi lori mate-isin mai Timor, entaun tanba tarde nune’e labarik ne’e nia família akuza fali madre sira maibé parese lori to’o mai ona Timor, ne’ebé agora timor-oan mate iha rai-li’ur ha’u sei husu tuir no sira tenke lori mai,” nia akresenta.
Kronolojia akontesimentu katak traballadór ne’ebé hetan asidente iha Koreia Súl, antes ne’e sira na’in-tolu konsumu alkoól no halai motór tuir auto estrada mak hetan dezastre, rua lakon vida, enkuantu ida kanek no baixa iha ospitál. Enkuantu kronolojia loloos maka traballadór na’in-ida ho motór halai uluk soke bidon iha auto estrada, na’in-rua seluk mai ho motór soke tan ida iha oin no taxi ida mai soke sama tan traballadór na’in-rua ho motór hodi halo sira lakon vida, ida ho motór mesak hetan kanek.
Jornalista : Antónia Gusmão
Editora : Julia Chatarina
