DILI, 02 agostu 2023 (TATOLI)—Sekretáriu Estadu Formasaun Profisionál no Empregu, Rogério Araujo Mendonça, hateten, nia parte simu ona informasaun hosi adidu relasiona ho traballadór na’in-rua ne’ebé mate iha Korea Súl loron 30 jullu 2023.
“Hosi relatóriu ne’ebé adidu haruka mai ohin dadeersan, haktuir kronolojia akontesimentu katak traballadór ne’ebé hetan asidente iha Koreia Súl, antes ne’e sira na’in-tolu konsumu alkoól no halai motór tuir auto estrada mak hetan dezastre, rua lakon vida, enkuantu ida kanek no baixa iha opstitál. Tuir informasaun hosi adidu katak sira ne’e mesak sees ona hosi sistema ka ilegál,” Sekretáriu Estadu informa iha Becora, kuarta ne’e.
Kronolojia loloos maka traballadór na’in-ida ho motór halai uluk soke bidon iha auto estrada, na’in-rua seluk mai ho motór soke tan ida iha oin no taxi ida mai soke sama tan traballadór na’in-rua ho motór hodi halo sira lakon vida, ida ho motór mesak hetan kanek.
“Risku ba traballadór sira ne’ebé sees hosi sistema mak bainhira mate sei la hetan pensaun ka kompensasaun tanba livre ona hosi kontrolu Estadu no família tenke responsabiliza tanba antes sira sai hosi Timor hodi bá serbisu, iha ona akordu labele kontra regra sira maibé ikus kontra nafatin,” governante ne’e akresenta.
Notísia relevante : Autoridade Koreia Súl halo investigasaun kauza mate traballadór timor-oan na’in-rua
Nia dehan, kona-ba prosesu mate-isin atu transporta mai Timor-Leste, tanba traballadór ne’ebé mate sees ona hosi sistema, maka depende ba lei Koreia Súl.
”Parte Governu liuhosi Sekretaria Estadu Formasaun Profisionál no Empregu (SEFOPE) nafatin kontaktu ho Embaixadór no adidu sira iha Koreia Súl kona-ba prosesu kontinuasaun, tanba agora mate-isin sei halo autópsia, bainhira hotu SEFOPE kontinua buka solusaun ba mate-isin atu lori mai,” Sekretáriu Estadu tenik.
Biban ne’e, governante ne’e husu ba traballadór sira ne’ebé daudaun sei serbisu iha sistema laran atu nafatin kumpre regra sira, liu-liu labele sees hosi sistema nune’e bainhira akontese buat ruma Governu país rua bele responsabiliza hotu.
Iha fatin hanesan, Embaixadór Koreia Súl iha Timor-Leste, Shin Mantaek, hato’o sentidu kondolénsia ba família tomak iha Timor-Leste no fiar katak Governu sei halo esforsu lori fila mate-isin mai.
“Ami fiar katak Governu Timor-Leste sei halo esforsu lori fila mate-isin sira ne’e mai, ami mós sei fó apoiu buka dalan lori fila mate-isin ne’e mai Timor-Leste,” nia realsa.
Traballadór na’in-tolu ne’ebé hetan asidente no lakon vida mak hanesan Gracildo Soares da Silva hosi munisípiu Ainaro, hahú serbisu iha Koreia Súl iha tinan 2012, Florindo de Araujo Fátima hosi munisípiu Ainaro, hahú serbisu iha tinan 2016 no traballadór ne’ebé hetan kanek ho naran Rui Fernando da Silva hosi munisípiu Baucau, hahú serbisu iha tinan 2018.
Daudaun ne’e, SEFOPE rejista traballadór ne’ebé serbisu iha Koreia Súl no sees ona hosi sistema hamutuk 1.000.
Jornalista : Arminda Fonseca
Editora : Julia Chatarina
