iklan

EKONOMIA, HEADLINE

Autoridade Koreia Súl halo investigasaun kauza mate traballadór timor-oan na’in-rua

Autoridade Koreia Súl halo investigasaun kauza mate traballadór timor-oan na’in-rua

Diretór Jerál SEFOPE, Paulo Alves. Imajen Tatoli/Francisco Sony

DILI, 31 jullu 2023 (TATOLI)Autoridade Koreia Súl daudaun ne’e halo hela investigasaun ba kauza mate traballadór timor-oan na’in-rua.

“Loos horiseik iha rede sosiál virál loos, kona-ba ita-nia traballadór na’in-rua ne’ebé mate iha Koreia Súl, tuir informasaun ne’ebé ha’u hetan hosi adidu traballadór katak ita-nia traballadór ne’ebé hetan asidente ne’e na’in-tolu, rua mate, ida liman mak kanek maibé kronolojia akontesimentu ne’e daudaun parte seguransa Koreia Súl sei halo hela investigasaun kona-ba dezastre ne’e rasik,” Diretór Jerál Sekretaria Estadu Formasaun Profisionál no Empregu (SEFOPE), Paulo Alves, informa ba Agência Tatoli iha ninia knaar fatin, Caicoli, segunda ne’e.

Notísia relevante : Governu Koreia Súl deporta ona traballadór na’in-hitu komete atividade ilegál

Nia dehan, maski tuir informasaun ne’ebé espalla iha rede sosiál katak traballadór na’in-rua mate tanba hetan asidente ne’ebé kauza hosi konsumu alkoól, maibé to’o agora adidu no asistente adidu seidauk bele fó informasaun klaru kona-ba kestaun ne’e tanba buat hotu sei iha prosesu investigasaun nia-laran.

“Parte seguransa sei foti dadus ba akontesimentu ne’e, ne’ebé sira mate tanba konsumu alkoól duni ka lae, sira na’in-rua serbisu iha área saida, sira sei iha sistema ka lae, no identidade matebian sira-nia inklui mate-isin bainhira mak atu lori mai, buat sira ne’e hotu sei iha prosesu investigasaun, ne’ebé ita hein adidu manda rezultadu relatóriu investigasaun ne’e mai mak ita hatene,” nia akresenta.

Tuir Diretór, aban lae bainrua adidu sei haruka uluk kronolojia hosi akontesimentu ne’e, nune’e parte SEFOPE bele fó sai informasaun ofisiál.

Iha sorin seluk, Diretór Diresaun Nasionál Exteriór SEFOPE, Filomeno Soares, husu nafatin traballdór sira iha rai-li’ur atu kumpre regra ne’ebé estabelese iha nasaun ne’ebé serbisu ba nune’e labele fó risku ba an rasik.

“Ha’u husu ita-nia traballadór hotu ne’ebé daudaun hala’o serbisu iha Koreia Súl no Austrália, kuidadu-an no kumpre nafatin regra sira ne’ebé iha, nune’e buat hotu la’o di’ak no imi serbisu la’o di’ak hodi haruka osan mai ajuda ekonomia família nian,” nia enkoraja.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!