DILI, 03 agostu 2023 (TATOLI)–Primeiru-Ministru (PM), Kay Rala Xanana Gusmão, promete katak sei kria sistema ida di’ak hodi hadi’a mentalidade no halo loos atuasaun membru Polísia Siéntifika Investigasaun Kriminál (PCIC, sigla portugés).
“Tenke iha mudansa mentalidade, tenke iha mudansa atuasaun tanba PCIC forma ho nia kbiit ne’e ba saida, tanba ne’e mak ita dehan Polísia Sientífika, ne’ebé Polísia Sientífika la’ós katak ema naok hudi nia ba preende, atu preende ema naok hudi ne’e tenke presiza Polísia Sientífika? ne’ebé sei hadi’a, ita hakarak atu serbí povu,” Xanana hateten hafoin ramata reuniaun semanál ho Xefe Estadu, iha Palásiu Prezidensiál, Bairru-Pité, kinta ne’e.
Xefe Ezekutivu dehan, Governu iha hanoin atu kuriji fali sistema sira ne’ebé la’o laloos hodi ba loos.
“Tenke fó hanoin fali katak sira-nia servisu saida, la’ós atu kaer ema iha ne’e ka iha ne’ebá, lae? Polísia Sientífika Investigasaun, katak nia uza siénsia mak ba investiga la’ós atu ba kaer, ne’ebé ami define didi’ak tiha buka nafatin hadi’a PCIC,” nia akresenta.
Notísia relevante : PR aseita Governu buka hadia PCIC
Iha programa IX Governu ba tinan-lima, prevee mós atu halo reestruturasaun iha PCIC tanba nesesidade absoluta atu iha integridade no profisionalizmu boot liu maka halo revizaun ba Planu Estratéjiku Seguransa Interna tinan 2030 atubele adekua planu ne’e ba dezafiu ne’ebé daudaun iha setór seguransa interna no protesaun sivíl.
PCIC hahú estabelese iha tinan 2009 ho akordu kooperasaun bilaterál entre Ministériu Justisa (MJ) Timor-Leste no Portugál ninian.
Iha maiu 2014, dekretu-lei númeru 15/2014 hetan aprovasaun, hodi kria ofisialmente PCIC, ne’ebé iha nível nasionál sei hala’o servisu liuhosi kooperasaun ho entidade sira seluk ne’ebé halo investigasaun kriminál, hanesan Polísia Nasionál Timor-Leste (PNTL), Komisaun Antí-Korrupsaun (CAC, sigla portugés) no Servisu Migrasaun.
Iha fali nível internasionál, PCIC sei servisu hamutuk ho The International Criminal Police Organization (INTERPOL) inklui ajénsia seluk ne’ebé hala’o serbisu kona-ba krime transnasionál.
PCIC organiza tuir ierarkia hanesan korpu superiór polísia kriminál, ho rejime karreira espesiál, ne’ebé haktuir orgánika Ministru Justisa nian, ho misaun atu fó tulun ba autoridade judisiál sira, dezenvolve no promove asaun prevensaun, detesaun no investigasaun hirak ne’ebé hola parte iha ninia kompeténsia ka hirak ne’ebé autoridade judisiál kompetente sira fó ba nia, hanesan asegura sentralizasaun nasionál ba informasaun kriminál no koordenasaun operasionál ne’e rasik no kooperasun polisiál internasionál.
Aleinde ne’e, órgaun polisiál ne’e la’o tuir atribuisaun ne’ebé define tiha iha lei, haktuir Kódigu Prosesu Penál no kumpre loloos ba Konstituisaun no lei sira.
Nune’e mós, sei atua de’it iha defeza sosiedade nian, haktuir loloos legalidade demokrátika nian no kona-ba sidadaun sira-nia direitu.
Jornalista : Antónia Gusmão
Editora : Julia Chatarina
