VIQUEQUE, 04 agostu 2023 (TATOLI)—Servisu Diresaun Nasionál Transporte Terrestre (DNTT) munisípiu Viqueque rekolla ona reseita hamutuk $36.496 ba kofre Estadu iha trimestre daruak tinan ne’e.
“Hahú husi trimestre dahuluk no daruak ami konsege rekolla reseita $36.496, ne’ebé reseita sira ne’e mai hosi inspesaun veíkulu no motorizada, karta kondusaun ba motorista sira no troka naran dokumentu,” Diretór Servisu DNTT Viqueque, Elvino da Cruz, relata ba Agência Tatoli, iha ninia knaar fatin, Beloi, sesta ne’e.
Notísia relevante : DNTT Viqueque rekolla taxa rodoviária $24.000 resin durante fulan-haat
DNTT daudaun ne’e menus rekursu umanu hodi halo atendimentu ba abitante sira ne’ebé mai trata dokumentu veíkulu.
“Iha tempu VIII Governu kontratu funsionáriu kazuál hamutuk na’in-17, maibé foin lalais sira-nia kontratu la extende, nune’e hela funsionáriu na’in-rua, hamutuk ho ha’u na’in-tolu, ne’ebé ha’u sente difikuldade maka menus rekursu umanu,” nia akresenta.
Maski nune’e, funsionáriu ne’ebé iha kontinua nafatin fó atendimentu hahú segunda to’o sesta kada semana.
Tuir dadus, reseita hosi inspesaun, lisensa, karta kondusaun iha fulan-janeiru rekolla reseita $7.805, fevereiru $6.900, marsu $6.392,50, abríl $2.955, maiu $3.927,50 juñu $5.151 no jullu $3.365, nune’e totál reseita hamutuk $36.496.
Jornalista : Vitorino Lopes da Costa
Editora : Julia Chatarina
