VIQUEQUE, 26 maiu 2023 (TATOLI)–Diresaun Nasionál Transporte no Terrestre (DNTT) munisípiu Viqueque rekolla taxa rodoviária $24.052,50 durante fulan-haat, janeiru to’o abríl 2023.
“DNTT nia kompeténsia ida maka buka reseita hodi hatama ba kofre Estadu, nune’e reseita sira ne’ebé durante ne’e ami rekolla iha munisípiu Viqueque mai hosi renovasaun karta kondusaun, teste ba karta kondusaun, inspesaun ba veíkulu kompostu hosi motorizada no karreta privada sira, transporte públiku, troka naran no rejistu foun sira,” Diretór Servisu DNTT munisípiu Viqueque, Elvino da Cruz, informa iha ninia knaar fatin, Beloi, sesta ne’e.
Notísia relevante : DNTT Viqueque rekolla reseita $6.900 ba kofre Estadu
Iha inísiu janeiru 2023, ba kategoria inspesaun ho invoice 400 ho reseita $6.415, lisensa 28 ho reseita $465, karta kondusaun 63 ho reseita $670, rejistu 13 ho reseita $255, nune’e totál invoice 504 ho totál reseita $7.805.
Fevereiru iha inspesaun ho invoice 360 ho reseita $5.390, lisensa 26 ho reseita $440, karta kondusaun 20 ho reseita $350, rejistu 62 ho reseita $720, totál invoice 476 ho totál reseita $6.900.
Marsu iha inspesaun ho invoice 315 ho reseita $4.575, lisensa 19 ho reseita $580, karta kondusaun 43 ho reseita $690, rejistu 51 ho reseita $547, totál invoice 428 ho totál reseita $6.392,50.
Abríl iha inspesaun ho invoice 125 ho reseita $1.885, lisensa 11 ho reseita $495, karta kondusaun rua ho reseita $40, rejistu 43 ho reseita $535, totál invoice 181 ho totál reseita $2.955.
Nia dehan, dezafiu ne’ebé durante ne’e hasoru maka falta dokumentu livrete no karta kondusaun no seidauk iha sistema baze dadus, nune’e bele halo kontrolu ba dadus sira.
“Durante ne’e funsionáriu DNTT tenke lori dokumentu livrete no karta kondusaun ba munisípiu Baucau hodi bele trata. Ami mós laiha transporte hodi fasilita tula dokumentu sira ba Baucau. Ida-ne’e sai hanesan dezafiu ba ami-nia servisu atendimentu durante ne’e,” nia akresenta.
Daudaun ne’e funsionáriu DNTT Viqueque hamutuk na’in-20, kompostu hosi kontratadu na’in-19 no permanente na’in-ida.
Jornalista : Vitorino Lopes da Costa
Editora : Julia Chatarina
