iklan

EKONOMIA, HEADLINE

Folin foos iha kapitál Dili kontinua sa’e

Folin foos iha kapitál Dili kontinua sa’e

Loja balun iha Dili fa’an nesesidade bázika. Imajen Tatoli/Arminda Fonseca

DILI, 04 agostu 2023 (TATOLI)—Folin nesesidade bázika balun, liu-liu foos iha kapitál Dili daudaun kontinua sa’e ho razaun aplikasaun taxa importasaun iha Portu Tibar sa’e.

Funsionáriu loja Marfazas, Agostinho Freitas, informa, foos ne’ebé daudaun folin sa’e ho marka Tali-Mera 25kg ho folin $17,50 tanba negosiante sosa hosi loja distribuitór ho folin $17, foos marka Beruang sosa $16,50 fa’an ho $17, globus sosa 16,50 fa’an fali $17.

“Entaun foos sira ne’e ami sosa mai fa’an fali, manán $0,50 de’it, ami fa’an bazeia ba loja distribuitór sira fa’an, bainhira sira hasa’e folin ami mós tenke hasa’e folin,  tanba loja distribuitór sira dehan sasán folin sa’e tanba taxa iha Portu Dili mak sa’e,” Agostinho Freitas, hateten ba Agência Tatoli iha Bairru-Pite, sesta ne’e.

Notísia relevante : Membru PN preokupa ho folin foos sa’e iha merkadu

Nia dehan, komparasaun folin foos antes ne’e no agora iha mudansa, hahú hosi fulan-janeiru to’o maiu foos 25kg ho folin $14,50 fa’an $15 agora mudansa ne’e hahú juñu to’o agora, kada semana folin distribuitór sira hasa’e $0,25 no ikus mai foos 25kg fa’an ho $17,50.

Enkuantu, folin produtu mina sona, mie, manu-tolun no seluk tan folin tun ona.

“Produtu mie antes ne’e loja distribuitór fa’an kaixa ida $8, ami fa’an fali $8,25, agora kaixa ida $6,65 tanba sira fa’an $6, kona-ba mina sona ho marka Bimoli folin uluk $11 maibé agora tun fali ona litru 5 agora fa’an $7, marka seluk ne’e tun tan no balun $6. Ami fa’an manu-tolun sosa hosi Railaco no Loes, folin bazeia ba nia medida, balun kaixa ida $57,50 no balun $55, ne’ebé ami mai fa’an fali rak ida $5, rahun fuan lima $1, masin-midar folin saku ida $85,” nia tenik.

Foos sira ne’ebé durante ne’e negosiante sira sosa hosi loja distribuitór sira hanesan Perissos, Kriativu Furak, Alfa Dili.

Antes ne’e, Governu introdús impostu seletivu konsumu foun  kompostu hosi 10% ba karreta ho valór liu $10.000, 20% ba karreta ho valór liu  $25.000, 30% ba veíkulu ho valór liu $550.000. Aumenta iha impostu konsumu tabaku ho produtu tabaku seluk hosi $50 kada kilograma sa’e ba $100, impostu konsumu foun $1 kada kilograma ba masin-midar, introdusaun impostu konsumu foun ho valór $3 kada litru ba babida asukarada (fanta, coca-cola, Sunkist, sprite no seluk tan).

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!