DILI, 04 agostu 2023 (TATOLI)—Prezidente Komisaun C trata asuntu Finansa Públika iha Parlamentu Nasionál, Deputadu Cedeliza dos Santos, konkorda ho planu IX Governu Konstituisionál atu revee lei taxa importasaun ho intensaun hakarak normaliza fila-fali presu sasán importadu.
Notísia Relevante: Governu hakarak revee lei impostu seletivu hodi normaliza presu sasán
“Ha’u hanoin ida-ne’e Governu nia planu di’ak tebes. Iha lei Orsamentu Jerál Estadu (OJE) 2023 iha taxa ne’e iha modelu rua mak iha ne’eba, primeiru taxa ita bolu sasán sira-ne’ebé hanesan masin midar, karreta, tabaku mak taxa ne’e aumenta tiha ona. Agora, iha tan artigu ida aumenta taxa ida hosi orijinál hosi 2,5 mai kedas 5%. Ida-ne’e, ita bele dehan taxa ida sa’e 100%. Dala ruma dehan taxa ida espesífiku ne’e la ko’alia kona-ba foos, mina maibé sira haluha tiha katak ida hosi 2,5% sae ba 5%, ne’e, nia sasán ne’ebé mak importasaun tama nian kona hotu taxa, nune’e konkorda ho Governu atu hatun impostu,” nia hateten ba jornalista sira iha PN, sesta ne’e.
Iha lei OJE 2023 atuál, tanba ne’e mak sasán sira hanesan foos, mina ne’e inklui hotu sa’e, ne’ebé bele muda hosi 5% ba iha 2,5% ne’e la dehan taxa ne’e hamos maibé mantein nafatin ho taxa refere.
“Hanoin di’ak tebes ajuda ita-nia povu labele fó impaktu ba sasán importasaun, tanba Timor-Leste sei menus sasán prodús rasik. Maiória, sasán ita uza ba konsumu rasik hanesan foos, mina mai hosi hotu rai-li’ur, entaun se ita hasa’e impostu ba sasán sira ne’ebé tama, ita lahatete dehan foos ka mina labele kona, ita la dehan hanesan ne’e. Sasán sira-ne’ebé tama, kona hotu impostu 5%, tanba ida-ne’e iha impaktu mós,” nia hateten.
Tanba ne’e, Prezidente Komisaun C ne’e konkorda, ho deklarasaun Primeiru-Ministru nian atu hatun hikas impostu ida-ne’e iha proposta Orsamentu Retifikativu 2023, ne’ebé sei aprezenta ba iha PN.
Entretantu, liga ba planu IX Governu Konstituisionál atu revee lei taxa importasaun, jornalista destakadu iha PN tenta konfirma ho bankada FRETILIN iha PN, maibé seidauk hatán tanba sei hein Governu aprezenta proposta Orsamentu Retifikativu 2023 hafoin bele ko’alia.
Notísia Relevante: PN aprova OJE 2023 hasa’e taxa impostu seletivu ba konsumu nian
Jornalista : Nelson de Sousa
Editór : Cancio Ximenes
