PR Horta: “Muda negosiante Largo Lecidere presiza kria kondisaun”
DILI, 04 agostu 2023 (TATOLI)–Xefe Estadu Timor-Leste, José Ramos Horta, hateten muda negosiante sira iha jardin Largo de Lecidere presiza kria kondisaun saúde ne’ebé di’ak no kondisaun seguransa.
Notísia Relevante: Negosiante bele faan iha Jardin Largo Lecidere maibé labele hela permanente
“Ha’u bele dehan de’it autoridade munisípiu ho Governu buka fatin di’ak hodi ema buka moris. Se sira lakohi atu iha Lecidere no iha ne’ebé ne’e, estuda lai fatin ruma ne’ebé di’ak kria kondisaun, kria kondisaun saúde di’ak no haree kondisaun seguransa no fatin ne’ebé di’ak ba komersiante sira. Se tau fali ba fatin mamuk ema laiha mak signifika labele,” PR Horta hateten ba jornalista sira iha Palásiu Prezidensiál Nicolau Lobato, Bairru -Pite, sesta ne’e.
Xefe Estadu kontente tanba Governu ho AMD halo diálogu hodi buka solusaun ba negosiante sira.
“Ha’u kontente tebes, tanba ha’u rona membru governu ba to’o iha ne’ebá no sira dehan autoridade munisípiu, Governu ho imi halo diálogu, ida-ne’e di’ak para hetan solusaun ida,” nia dehan.
Se Autoridade Munisípiu Dili (AMD) dehan halo diálogu mak labele hasai lai negosiante sira, hein lai maibé hotu-hotu tenke simu.
“Ha’u husu autridade ne’ebé mak foti desizaun, para lai ho ida-ne’e. Tanba lae, dehan halo diálogu maibé lakohi halo no parte ida hakarak halo kedas despezu. Se halo diálogu entaun halo lai ba para hetan solusaun. Depois mak ha’u haruka palásiu prezidénsia apoiu osan uitoan. Governu rasik mobiliza osan hodi haree tenda kualidade ruma. Ho ida-ne’e ha’u sei ko’alia ho nasaun unida tanba sira iha programa ida feto negosiante sira. Ha’u sei bolu programa mikrokréditu, hodi fó kréditu maibé krétidu ne’e todan demais,” nia dehan.
Negosiante iha jardin Largo de Lecidere, Emilia do Rosário, hateten negosiante Largo de Lecidere husu Governu kria fatin dignu hodi faan labele duni sira henesan balada.
“Tanba ne’e, husu Governu presiza kria fatin ida dignu ba ami la’ós mai duni ami hanesan animál, ami iha direitu atu hetan fatin hodi buka moris. Tanba ne’e, ohin, ami hato’o ami-nia preokupasaun ba Nai Prezidente Partidu maibé Na’in Prezidente Repúblika mós konkorda lori ami ba tau fatin ne’ebé sira prepara no kria fatin ba ami,” nia dehan.
Nune’e, nia dehan, atu hasai negosiante hosi Largo de Lecidere presiza tuur hamutuk no estuda lai bainhira iha ona solusaun mak hasai no muda ba fatin ne’ebé preparadu.
“Ami lamenta tebes autoridade munisípiu Dili nia atetude tanba sira mai bosok ami. Iha 18 jullu 2023, autoridade munisípiu Dili hamutuk ho PNTL hodi ameasa ami dehan antes loron 01 agostu tenke hamamuk fatin. Se la hamamuk mak ami ho forsa sei aruma imi-nia sasán. Ho ida-ne’e ami sente sai bainaka iha ami-nia rain,” nia hateten.
Nia hatutan AMD halo audiénsia ho negosiante hodi ko’alia kona-ba fatin faan maibé bosok no la realiza enkontru ne’e, maibé iha 02 agostu ne’e sira avizu dehan imi tenke sobu imi-nia tenda ne’e hodi tau tenda movél.
“Ami husu ba sira katak atu tau iha fatin ne’ebé. Maibé, sira dehan ami tempu limita tebes no ami laiha tempu ba imi-nia pergunta no preokupasaun sira. Ho kestaun ne’e, Prezidensiál Repúblika hateten para lai ho ida-ne’e, atu duni ba ne’ebé ne’e para lai. Estadu estuda lai no buka tuur hamutuk hodi buka nia solusaun. Signifika ami mantein nafatin ho ami-nia fatin,” nia dehan.
Jornalista : Osória Marques
Editór : Cancio Ximenes
