DILI, 05 agostu 2023 (TATOLI)—Ministru Komérsiu Indústria, Nino Pereira, hamutuk ho ekipa, sábadu ne’e, tuun direita halo inspesaun ba armazen empreza importadór no distribuidór foos hanesan Perissos, Lisun, Kreatif Furak, no Alfa Dili.
“Ohin, ita mai halo inspesaun iha armazen Perissos tamba empreza ne’e hanesan importadór foos, tamba ne’e hakarak konfirma stoke iha armazen tanba ita akompaña presu foos agora sa’e, liu-liu foos kilograma 25, ne’e tamba mudansa presu iha nasaun exportadór sira, nune’e Governu hakarak impoin ko’alia ho importadór, Sentru Lojístika Nasionál (CLN, sigla portugés) no Ministru Koordenadór Asuntu Ekonómiku, atu halo intervensaun hodi estabiliza presu iha merkadu,” Ministru hateten ba jornalista sira hafoin halo inspesaun iha armazen empreza Perissos, Fatuhada.
Empreza exportadór sira hahú fa’an kada tonelada ho presu $500 to’o $600, nune’e halo presu kada saku sa’e.
“Iha nasaun orijen produsaun menus no inflasaun akontese, ikus mai halo sira tenke hasa’e presu foos ba kada tonelada, nune’e afeta mós ba presu foos ne’ebé sirkula iha Timor-Leste,” nia akresenta.
Notísia relevante : CLN sei importa tan foos tonelada 4.000 resin hosi nasaun rua
Maski nune’e, Governu atu halo intervensaun merkadu, ne’ebé daudaun CLN halo hela importasaun foos hosi nasaun Índia no Vietname pur volta tonelada 40.000.
“Ita sei hala’o koordenasaun ho Ministru Koordenadór Asuntu Ekonómiku atu ita iha diskusaun inklui hamutuk ho ita-nia importadór sira. Ita haree ona meius para halo intervensaun merkadu hodi estabiliza presu foos iha merkadu,” governante ne’e tenik.
Tuir Ministru, Governu sei halo intervensaun merkadu ho presu razoável, presu kilograma 25 ho folin hosi $14 to’o $15 iha territóriu, liu-liu fatin sira ne’ebé presu sa’e maka’as.
“Hanoin durante ne’e informasaun ne’ebé espalla mós, pur ezemplu iha Fatumea dehan foos kilograma 25 nia presu sa’e to’o $20, maibé bainhira ekipa hosi diresaun nasionál ba iha ne’ebá sei mantein $17. Tanba ne’e, Governu sei buka alternativa atu haree inklui planeia atu hatun taxa impostu fila ba normál hosi 5% ba 2,5%,” nia adianta.
Notísia relevante : Governu hakarak revee lei impostu seletivu hodi normaliza presu sasán
Governu nafatin buka meiu hodi kontrola folin labele sa’e liu presu justu tuir dekretu-lei númeru 29/2011, ne’ebé mensiona folin labele liu 15%.
“Intervensaun ne’e ita sei haree, depois sei iha koordenasaun ida ho CLN ho MKAE, ita haree tempu ne’e atu labele prejudika mós tempu naruk, tamba ohin loron sira ne’ebé fa’an retaillu balun hasa’e, halo espekulasaun hodi hasa’e presu, ne’ebé ita presiza iha kontrolu másimu no ita hakarak parte hotu-hotu bele koopera, labele halimar ho situasaun ne’ebé mak povu halerik hela kona-ba presu foos. Ida-ne’e hahú fó mensajen mai ita atu valoriza ona produtu rai-laran hodi konsumu ai-han saudável,” nia adianta.
Iha fatin hanesan, Diretór Perissos, James Jong, hateten stock foos iha armazen nia kuantidade sufisiente hodi fornese ba merkadu rai-laran.
“Ami-nia papel mak kontribui ba seguransa ai-han, liu-liu ba foos, tanba ne’e ami iha responsabilidade boot maski situasaun agora difísil atu hetan foos hosi rai-li’ur. Ha’u sei esforsu maka’as hodi foos labele menus iha rai-laran maski folin sa’e tamba kolega importadór foos ta’uk foos presu sa’e tiha maka’as, derepente tuun fali ita lakon osan barak,” nia realsa.
Foos ne’ebé empreza sira hatama hosi nasaun exportadór sira hanesan Índia, Vietname no nasaun sira seluk iha fulan ida resin kuaze folin sa’e kada tonelada.
“Folin sa’e tamba mudansa klimátika, ita hatene Indonézia tinan ne’e sosa foos maka’as no nasaun sira hotu iha rejiaun ne’e pániku ka hakfodak, Indonézia produsaun menus,” Diretór empreza tenik.
Daudaun Perissos fa’an foos ho marka Gostu Loos kilograma 20 ho presu $13,50 (antes ne’e presu $13) no Globus kilograma 25 ho presu $16 (antes ne’e presu $15,50).
Jornalista : Nelson de Sousa
Editora : Julia Chatarina
