Prezidente Repúblika dezloka ohin bá Indonézia
DILI, 05 agostu 2023 (TATOLI)–Prezidente Repúblika (PR), José Ramos Horta, sábadu ne’e, sei dezloka bá Jakarta, Indonézia hodi halo vizita serbisu privadu.
Vizita Xefe Estadu iha loron 05 no sei fila fali iha loron 08 agostu hodi sai oradór ka bainaka iha diálogu demokrasia iha mídia Jakarta Post iha loron 07 agostu ne’ebé hanesan parte ida hosi komemorasaun aniversáriu ba da-40 hosi imprensa ne’e.
“Jakarta Post sai ona nu’udar defensór ne’ebé metin kona-ba liberdade imprensa iha Indonézia no nasaun seluk. Diálogu demokrasia sei foka ba ambiente demokrasia iha sudeste aziátiku, ne’ebé kobre kestaun sira hanesan dezenvolvimentu ekonómiku no papél liberdade imprensa hodi mantein demokrasia,” refere nota ne’ebé Agência Tatoli asesu hosi mídia Prezidénsia Repúblika, sábadu ne’e.
Notísia relevante : PR Horta-Embaixadór Indonézia diskute prosesu adezaun TL ba ASEAN
Iha sesaun diálogu demokrasia, Laureadu Nobel Pás ne’e sei partilla ninia esforsu rasik hodi hametin demokrasia iha Timor-Leste no nasaun seluk.
Timor-Leste nu’udar nasaun joven ida maibé moris buras entre nasaun Ázia Pasífiku hodi alkansa topu 10 índise liberdade imprensa mundiál iha tinan 2023.
Tuir nota, Xefe Estadu hato’o ofísiu kona-ba realizasaun viajen privadu bá Jakarta tuir termu efeitu iha Konstituisaun artigu 80 númeru 3 ba Parlamentu Nasionál, ne’ebé sei hala’o anúnsiu iha reuniaun plenária semana oin.
Jornalista : Nelson de Sousa
Editora : Julia Chatarina
