DILI, 07 agostu 2023 (TATOLI)–Embaixadór Brunei Darussalam iha Timor-Leste, Wan Hadfi Latif, hasoru malu ho Primeiru-Ministru, Kay Rala Xanana Gusmão, hodi hato’o felitasaun nu’udar Xefe Governu ba IX Governu Konstitusionál.
“Objetivu hasoru malu ida-ne’e hodi parabeniza Primeiru-Ministru ba nia tomada pose. Brunei Darussalam ho Timor-Leste iha ona relasaun diplomátika desde tinan 2002, amizade ida-ne’e la’o di’ak tebes no Primeiru-Ministru mós amigu di’ak Brunei nian, nia ba ona Brunei no iha relasaun di’ak ho ami-nia Liurai,” Wan Hadfi Latif, hateten hafoin hasoru malu ho Xanana, iha Palásiu Governu, segunda ne’e.
Notísia relevante : Empreza hosi Brunei Darussalam iha interese investe iha Timor-Leste
Aleinde ne’e, relasiona ho kontratu empreza privadu atu lori timor-oan bá serbisu iha Brunei, Embaixadór ne’e dehan, maski parte rua la diskute kona-ba asuntu ne’e, maibé nia mekanizmu mak presiza iha asinatura akordu entre Governu rua molok realiza planu.
“Tuir ha’u hatene agora sei iha preparasaun no negosiasaun ba akordu refere, maibé sira ne’e hotu depende ba Governu Timor-Leste tanba tuir ha’u hatene Sekretaria Estadu Formasaun Profisionál no Empregu (SEFOPE) rasik iha nia regra katak tenke iha akordu molok haruka traballadór bá nasaun ne’ebé de’it, maski iha ona kontratu ho empreza privadu,” nia akresenta.
Diplomata ne’e subliña, númeru traballadór ne’ebé empreza presiza depende ba demanda no importante hatene lian indonéziu no inglés.
Jornalista : Antónia Gusmão
Editora : Julia Chatarina
