DILI, 07 agostu 2023 (TATOLI)—Ministru Asuntu Kombatente Libertasaun Nasionál (MAKLN), Gil da Costa “Oan Soru”, hateten to’o iha fulan-jullu tinan 2023 ne’e, osan funan hosi fundu kontributivu kombatente ne’ebé iha konta bankária veteranu nian ne’e hamutuk $960.000.
Notísia Relevante: Fundu kontributivu Kombatente millaun $35-resin iha konta veteranu
“Ida-ne’e hanesan informasaun ida ba públiku, nune’e labele hamosu preokupasaun oioin no ida-ne’e tuir legalidade no públika ona iha Jornal Repúblika. Entaun, osan totál to’o fulan 31 jullu 2023 ne’e hamutu, $35.165.808,66 ho nia funan rihun $960. Osan inan ho funan hamutuk $36.125.893,” Oan Soru hateten ba jornalista sira iha nia kna’ar fatin, Caicoli, segunda ne’e.
Governante ne’e hateten, ida-ne’e atu hatán ba preokupasaun sira hosi membru Parlamentu Nasionál (PN).
“Ami hakarak hato’o informasaun balun hosi Ministériu Asuntu Kombatente Libertasaun Nasionál ba públiku, espesiál ba preokupasaun sira hosi destintu deputadu no depatada sira foti iha parlementu nasionál relasiona ho asuntu Kombatente no mós liga ho Konsellu Kombatente Libertasaun Nasionál. Ita-nia deputadu no depatada sira temi osan $30. Ida-ne’e ita-nia públiku, no ema iha Timor-Leste inklui veteranu sira hatene hotu. Ko’alia kona-ba koa osan $30 ne’e, ema sempre dúvida no dúvida hela de’it. Pergunta ne’ebé mosu iha Parlamentu Nasionál no husu ba Governu atu labele tau orsamentu ba tinan 2024, tanba bele uza de’it ona orsamentu$30 ne’e,” nia dehan.
Osan $30 ne’ebé atu koa ne’e bazeia ba programa VIII Governu nian ne’ebé mosu númeru 2.3.1, ne’ebé ko’alia kona-ba kria negósiu ka atividade negósiu ne’ebé mai ho veteranu nia osan rasik.
“Ida-ne’e implementa ha’u sei hanesan Sekretáriu Estadu Asuntu Kombatente Libertasaun no hanesan ema CNRT. Nune’e, iha novembru tinan 2018, halo konsultasaun haleu munisípiu 13 inklui RAEOA. Entaun, ne’e ita halo kongresu nasionál dahuluk iha dezembro 2019 hodi estabelese Konsellu Kombatente Libertasaun Nasionál (CCLN). Entaun, iha janeiru 2020 ita hahú koa veteranu nia osan $30 no to’o ohin loron iha ko’a fulan 43, tinan tolu fulan hitu (7), no kada ema $1.290 iha konta bankaria CCLN nian. Uluk, sei Sekretáriu Estadu no Ministru ein ezersisiu implementa bazeia ba deliberasaun númeru 1.1. Entaun, ita koa osan bazeia ba dekretu-lei númeru 8/2020, ne’ebé altera lei ba pensão dos combatentes e mártires da libertação nacional, hodi fó dalan ko’a osan,” nia hateten.
Nia dehan, osan ne’e koa bazeia ba pedidu CCLN mai iha Ministériu no Ministériu enkamiña ba Ministériu Finansa atu retein osan $30 kada ema automaticamente ba konta CCLN, dekretu-lei númeru 13/2022, 30 marsu, ne’ebé promulga hosi Prezidente Repúblika sesante, Francisco Guterres “Lú Olo.
“Tanba ne’e. agora ha’u reafirma tan katak programa ko’a osan $30 ne’e iha legalidade. Liuhosi dekretu-lei númeru 13/2022 fó kompeténsia ba CCLN hodi responsabilidade ba fundu ida-ne’e,” nia dehan.
Jornalista : Osória Marques
Editór : Cancio Ximenes
