DILI, 28 jullu 2023 (TATOLI)–Prezidente Konsellu Kombatente Libertasaun Nasionál (CCLN), Vidal de Jesus “Riak Leman”, hateten fundu kontributivu Kombatente Libertasaun Nasionál to’o agora millaun $35-resin iha konta veteranu nian.
Notísia Relevante: Riak Leman: Fundu kontributivu kombatente millaun $27,6 iha konta fundu veteranu
“Veteranu ne’ebé kontribui osan kada fulan $30 hosi tinan 2020 to’o agora ne’e, hamutuk ona miliaun $35-resin iha konta veteranu nian,” Riak Leman hateten ba Agência Tatoli liuhosi telefónika, sesta ne’e.
Fundu veteranu ne’e sei halo investimentu mak planu loke ospitál ba veteranu sira hodi bele fasilita no halo tratamentu saúde ba veteran sira iha territóriu nasionál.
“Hosi osan ne’e, ami planu atu harii ospitál bai ta-nia maluk veteranu sira. Maibé planu ne’e sei hato’o ba ministru hodi diskute no planu seluk mak loke banku hodi fó kreditu ba veteranu no ida-ne’e aprova ona no hein implementa de’it ona,” nia dehan.
Veteranu iha territóriu nasionál ne’ebé kontribui $30 iha kada fulan ne’e, hamutuk 27.828.
“Hosi totál veteranu ne’e tantu nia mate ona mós nafatin fó kontribuisaun ba fundu kontributivu ne’e. Tanba ida-ne’e fó benefísiu ba sira-nia oan sira-ne’ebé daudaun ne’e subtitui hodi simu osan nia aman ka inan nian,” nia hateten.
Kriasaun fundu kontribuitivu veteranu nian ne’e, ninia baze legál iha aprovasaun dekretu-lei númeru 8/2020, alterasaun ba dekretu-lei númeru 15/2008 ba pensaun-liuhosi Konsellu Ministru, promulgadu hosi Prezidente Republika iha 19 marsu 2020, hodi kria Gabinete Apoiu Programa Fundu Investimentu Veteranu Timor-Leste ne ebé despaixu deside hosi numeru 01/MACLN-SEACLN/I/2020 tau matan ba fundu investimentu.
Notísia Relevante: IX Governu sei kria Fundu Veteranu
Jornalista : Osória Marques
EDitór : Cancio Ximenes
