DILI, 07 agostu 2023 (TATOLI) – Ministra Edukasaun (ME), Dulce de Jesus, husu ba Prezidente foun Institutu Nasionál Formasaun Dosente no Profisionál Edukasaun (INFORDEPE), Domingos Martins, atu kria modelu formasaun distánsia ka online ba profesór sira, nune’e labele abandona alunu sira.
“Husu ba Prezidente nomeadu INFORDEPE ba períodu tinan haat nia ne’e atu iha tempu badak ne’e tenke muda formasaun ba profesór sira ho sistema online ka dijitalizasaun, nune’e sira labele abandona estudante sira iha aula laran”, Dulce hato’o asuntu ne’e iha serimónia tomada pose Prezidente foun INFORDEPE ne’ebé hala’o iha salaun Ian Martin Balide, segunda ne’e.
Governante esplika katak durante ne’e manorin sira uza tempu barak ba formasaun, maibé prejudika fali estudante sira tanba latuir dixiplina.
“Ne’e duni formasaun kontinua la’o atu kapasita profesór sira, tanba polítika ida mak garante kualidade edukasaun iha Timor-Leste, maibé tenke tama iha sistema online. Ho ida ne’e maka profesór sira sei tau nafatin sira-nian responsabilidade hodi akompaña estudante sira iha aula laran. Ha’u hakarak iha mandatu IX governu konstitusionál ne’e ita tenke halo netik buat ruma liuhusi metodolojia ne’ebé di’ak atu lori formasaun adekuada ba profesór sira, maibé labele prejudika fali estudante sira”, dehan.
Dulce de Jesus admite katak dalabarak formasaun ho distánsia ne’e hetan problema iha rede internét, tanba la’o lentu liu. “Ha’u husu mós ba profesór sira tenke halo esforsu maka’as hodi hetan formasaun ho sistema online. Ha’u lakohi tanba de’it rede internét monu, sira lakohi halo esforsu hodi tuir formasaun”, salienta.
Prezidente foun INFORDEPE, Domingos Martins, dehan sistema ida ne’e la’ós buat foun, maibé polítika ida ne’ebé Ministra Edukasaun hato’o ne’e atu fanu hodi buka hadi’a fali sistema sira ne’ebé maka INFORDEPE instala ona tanba antes ne’e mós INFORDEPE halo ona kooperasaun ho ajénsia dezenvolvimentu sira.
Domingos Martins realsa katak ho sistema formasaun sira hanesan ne’e nia parte sei esforsu atu uza iha tinan haat nia laran.
Nia mós promete katak depois simu tiha pose la’ós atu muda buat hotu ne’ebé maka la’o ona, maibé sei halo esforsu hodi kontinua programa formasaun no kapasitasaun ba dosente sira atu labele lakon sira-nian direitu ba formasaun adekuada iha futuru.
Domingos Martins substitui prezidente sesante Manuel Gomes ne’ebé simu pose iha tinan 2021.
Notísia relevante: INFORDEPE realiza ona formasaun ba profesór 8.741 iha área tolu
Jornalista: Tomé Amado
Editora: Maria Auxiliadora
