VIQUEQUE, 07 agustu 2023 (TATOLI)—Polísia Nasionál Timor-Leste (PNTL) Viqueque, segunda ne’e, muda negosiante hamutuk 200 resin ne’ebé fa’an sasán iha kalsada (trotoar) leten iha parte Beloi to’o Vila ba merkadu antiga iha postu Viqueque Vila.
Tuir Komandante PNTL munisípiu Viqueque hosi Unidade Tránzitu, Salvador Guterres, desizaun ne’e bazeia ba lei Kódigu Estrada hosi dekretu-lei númeru 06/2003 iha artigu 93 kona-ba trotoar fatin ba ema la’o ain, la’ós uza atu halo atividade negósiu.
“Ohin ami muda negosiante sira tanba foin lalais ami simu karta sirkulár ida hosi nasionál atu muda negosiante sira ne’ebé fa’an sasán iha trotoar leten sira. Tanba ema la’o ain iha trotoar leten mós la’o ladi’ak. Ho nune’e, ami muda negosiante sira ne’ebé durante ne’e uza trotoar halo atividade negósiu ba fali iha merkadu tuan, lokaliza iha edifísiu Eletricidade de Timor-Leste, Empreza Públika (EDTL, E.P) ninia oin,” Komandante Polísia informa ba Agência Tatoli, iha postu Viqueque Vila.
Notísia relevante : Jestaun merkadu no turizmu Viqueque hakarak intensifika kobransa taxa publisidade
Daudaun ne’e negosiante sira haloot ona sira-nia sasán hodi ba fa’an iha merkadu tuan.
“Iha semana kotuk ami aviza ona ba negosiante sira, nune’e ohin dada ona tali Polísia ba fatin sira ne’ebé maka negosiante sira uza hodi fa’an sasán, agora bandu ona. Karik ba oin ita-nia negosiante sira sei kontinua fa’an, bainhira ami hetan sei atua no ami sei foti sasán sira hodi fó ba ema sira ne’ebé tein iha ospitál. Kona-ba fatin ida-ne’e autoriade maka hatene, ami implementa lei Kódigu Estrada,” nia akresenta.
Negosiante 200 resin ne’e lorloron fa’an sasán sira hanesan roupa segunda mão, modo, hudi, batar, no produtu seluk tan.
Iha fatin hanesan, Negosiante, Vitória da Silva, rejeita muda negosiante sira ba merkadu tuan tanba laiha kondisaun hanesan sentina laiha no fatin kloot, nune’e nia husu parte Governu presiza tau konsiderasaun halo merkadu ida.
“Agora muda ami hanesan ne’e, ami iha merkadu ne’ebá kondisaun ladun di’ak. Ha’u husu parte autoridade no Governu atu haree kondisaun merkadu hodi kria kondisaun di’ak tanba ami povu moris ho negoósiu maka sustenta ami-nia moris,” nia adianta.
Nune’e mós, Diretór Jestaun Merkadu munisípiu Viqueque, Estevão de Carvalho, hateten, negosiante sira bele uza lai merkadu Olobai no merkadu ida tan preovizóriamente hodi halo negósiu.
“Ita iha kondisaun mínimu iha merkadu Olobai, maski fasilidade balun seidauk iha maibé provizóriu negosiante sira bele uza. Dadus negosiante sira ne’ebé uluk ami rejista hamutuk 140, maibé agora aumetan tan, ne’ebé bainhira tama hotu ba merkadu tuan ne’e fatin la to’o, negosiante balun bele fa’an iha merkadu Olobai,” Diretór hato’o.
Jornalista : Vitorino Lopes da Costa
Editora : Julia Chatarina
