RAEOA loke feira ho atividade sia komemora loron FALINTIL no Konsulta Populár
OÉ-CUSSE, 07 agostu 2023 (TATOLI) – Autoridade Rejiaun Administrativa Espesiál Oé-Cusse Ambeno (RAEOA) ajenda atividade sia (9) iha selebrasaun loron FALINTIL iha 20 agostu 1975 no loron Konsulta Populár 30 agostu 1999 ne’ebé, sei organiza diretamente hosi Sekretáriu Rejionál ba asuntu Komérsiu no Indústria, durante loron 21 hahú iha loron 10 to’o 31 agostu.
Notísia relevante: RAEOA realiza feira produtu lokál
Diretora Rejionál Komérsiu no Indústria, Domingas Sufa, informa, ajenda ba komemorasaun ne’e, hetan ona aprovasaun iha reuniaun Autoridade RAEOA, ho objetivu ida atu promove no valoriza produtu lokál sira-ne’ebé prodús hosi komunidade.
“Iha feira ne’e ita sei hala’o atividade sia, kompetisaun solu vokál, homan, soru-taís, mellora stand, ikon RAEOA, gastronomia, kompetisaun halai karung, no atividade jogu tradisionál sira hanesan bola-guling, kuru-kuru, futu-manu no kere-kere,” Domingas Sufa ba Tatoli iha Oé-Cusse, segunda ne’e
Nia esplika, komemorasaun loron FALINTIL 20 agostu 1975 no loron Konsulta Populár 30 agostu 1999, sei implementa iha Palaban, aldeia Sanane, suku Costa, sub-rejiaun Pante Makasar.
“Ita sei loke feira durante semana tolu, iha grupu 12 maka sei partisipa iha feira ne’e, maibé ami sei fahe tuir diresaun no instituisaun sira, hanesan Sekretáriu Rejionál hitu, Gabinete Prezidente Autoridade (GPA), envolve mós grupu mikro-pequenas, emprezariu sira, grupu kooperativa, grupu agrikultura, banku sira, Ajénsia Internasionál sira, ONG lokál no instuisaun religioza,” nia esplika.
Daudaun ne’e parte komisaun organizadora sirkula ona karta konvite ba autoridade lokál sira, jestór, xefe suku no aldeia, hodi halo preparasaun tanba sei mobiliza komunidade no grupu sira iha baze atu partisipa hodi hatudu no halo promosaun, ba sira-nia atividade ne’ebe mak durante ne’e hala’o ona iha baze.
Tanba durante atividade sia, ne’ebe hala’o iha feira ne’e sei iha avaliasaun hosi komisaun organizadora atu hetan prémiu, tanba autoridade aloka orsamentu ba eventu ne’e hamutuk rihun $13-resin.
Notísia relevante: Komemorasaun loron FALINTIL atu dignifika eroi fó vida ba luta libertasaun
Jornalista: Abílio Elo Nini
Editór: Evaristo Soares Martins
