Servisu Agrikultura halo levantamentu dadus ba produsaun hare iha Covalima
COVALIMA, 07 agostu 2023 (TATOLI)–Diretór Servisu Munisipal Agrikultura Covalima, Reinaldo Coli, hataten Tékniku sira halo levantamentu dadus kona-ba produsaun hodi halo estimasaun produsaun hare, tanba dazastre naturál ne’ebé akontese iha 03-04 jullu ne’e fó impaktu ba produsaun hare iha Covalima.
Notísia Relevante: Natar ektare 300-resin iha Suai Loro ameasadu sei abandona
“Rezultadu produsaun hare tinan 2023 iha munisípiu Covalima menus, ho nune’e provizóriu ita sei rekola dadus no ita halo estimasaun produsaun liuhosi formula ne’ebé iha. Entaun, seidauk finaliza tanba iha fatin balun koileta seidauk hotu,” Reinaldo Coli hateten ba Agência Tatoli iha resintu AMC, Sukaer Laran, segunda ne’e.
Tékniku sira sei halo lavantamentu dadus tanba foin lalais akontese dazastre naturál iha momentu agrikultór sira kolleta hela hare, nune’e fó impaktu hasa’e produsaun hare iha munisípiu Covalima no seguransa ai-han ba uma-kain sira.
Relasiona ho akontesimentu dezastre naturál iha munisípiu Covalima, polítika hosi Ministériu Agrilkuta no Pesca (MAP) sei distribui fini, ai-moruk, kultivasaun ai-horis no mós oferese mina gratuita ba agrikultór sira hodi hasa’e produsaun.
Bazeia ba dadus husi tékniku estensionista sira katak foin lalais akontese dezastre naturál fó impaktu produsaun hare ektare 441, no hosi dadus refere iha postu administrativu Zumalai ne’e konsege estaga hare ektare 251.
“Tuir dadus ne’ebé mak ita-nia tékniku rekolla, dadus loloos ita iha ektare 441 afetadu. Maibé, ida-ne’e la’ós iha postu ida de’it maibé mai hosi postu administrativu Zumalai tomak mak ektare 251 mak afetadu ba dezastre natural,” nia hateten.
Antes ne’e, iha 28 fulan-jullu tinan 2023, Diretór Protesaun Sivil Jestasaun Risku Dezastre Naturál munisípiu Covalima, Quintino da Costa, fó sai dadus katak akontese dezastre naturál iha munisípiu Covalima ne’ e rezulta uma-kain 730 afetadu ba dezastre natural, no hosi dadus ne’e vítima dezastre naturál postu administrativu Zumalai hanesan iha suku Tashilin uma-kain 102, suku Raimea ne’e xefe família 51 no iha Bairru Oebaba ne’e iha xefe família ualu (8).
Jornalista : Celestina Teles
Editór : Cancio Ximenes
