DILI, 08 agostu 2023 (TATOLI)—Membru Parlamentu Nasionál (PN) liuhosi Deputada bankada Partidu Demokrátiku (PD), Teresa Gusmão, husu Ministéiru Justisa liuhosi Serbisu Rejistu Notariadu no Konservatóriu atu hadi’a sistema atendimentu públiku ba idózu no invalidéz sira.
Notísia Relevante: Idoza ida lakon vida bainhira trata sertidaun RDTL iha Baucau
“Kona-ba kestaun burokrásia Ministéiru Justisa liuhosi Notariadu ne’e la’ós buat foun ona, nune’e presiza hadi’a,” Deputada Teresa Gusmão hateten ba jornalista sira iha uma fukum PN, tersa ne’e.
Deputada hosi bankada Governu ne’e lamenta, horisehik idóza ida lakon vida bainhira trata sertidaun RDTL Serbisu Rejistu Notariadu no Konservatóriu iha Baucau.
“Triste tebe-tebes, kazu ne’ebé mosu horisehik iha Baucau. Ita-nia avó ida idózu ona, tenke forma kle’ur atu trata dokumentu, rezulta parese nia forsa laiha ka halmaha, buat ruma halo lakon vida iha fatin,” nia dehan.
Preokupasaun ne’e la’ós foin akontese, tanba nia-parte haree ho matan iha Baucau joven sira ne’ebé hakarak trata dokumentu sira ba iha Notariadu forma ona iha dadeer madrugada, nune’e tempu ona presiza moderniza sistema trata dokumentu liuhosi online.
Ba preokupasaun ne’e, IX Governu foin estabelese fulan rua no situasaun ne’e espera bolu atensaun Governu atu tau atensaun sériu ba asuntu hirak ne’e, bele muda sistema hosi manul hodi evita sidadaun forma hein oras barak hodi trata dokumentu ho dignu.
“Horibainhira IX Governu aprezenta programa, ha’u aprezenta problema ne’e, Ministéiru Justisa liuhosi Notariadu no parte relevante, bele mós iha ospitál ho fatin ne’ebé de’it iha atendimentu públiku sira ne’e. Ita presiza haree ona, labele prezúdika sidadaun sira forma ho tempu no oras ne’ebé naruk maibé susar asesu ba sistema administrasaun,” nia hateten.
Governu mós presiza hakbesik administrasaun ka serbisu atendimentu sira-ne’e ba to’o iha komunidade iha área rurál, tanba haree ba distánsia.
Deputada FRETILIN, Lídia Norberta, lamenta mekanizmu atendimentu relasiona ho idóza ida lakon vida bainhira trata sertidaun RDTL iha Baucau.
“Kona-ba sistema atu asegura ita-nia avó sira to’o tempu atu simu subsídiu idózu ne’e, sira-nia direitu ita labele hasai. Maibé, iha mekanizmu ne’e mak tenke hadi’a atendimentu públiku,” nia hateten.
Notísia Relevante: “PR promulga programa IX Governu mak realiza pagamentu ba idozu-Invalidéz”
Jornalista : Nelson de Sousa
Editór : Cancio Ximenes
