DILI, 13 jullu 2023 (TATOLI)—Ministra Solidariedade Sosiál no Inkluzaun (MSSI), Verónica das Dores, hateten bainhira Parlamentu Nasionál (PN) aprova no Prezidente Repúblika promulga ona programa IX Governu Konstitusionál mak MSSI realiza pagamentu ba idozu no invalidez iha territóriu nasionál.
Notísia Relevante: IX Governu Konstitusionál submete ona programa ba PN
“Ita sei realiza pagamentu ne’e maibé hanesan ha’u dehan ita seidauk iha organograma no hein Parlamentu Nasionál aprova no Prezidente Repúblika promulga ona programa IV Governu mak ita realiza pagamentu ba idozu no invalidéz. Tanba, pagamentu ne’e iha ona nia lei ne’ebé hein realiza no ita sei to’o iha ne’ebá,” nia hateten ba Agencia Tatoli, iha Palásiu Governu.
Tanba ne’e, nia parte hamutuk ho Vise Ministra Solidariedae Sosiál no Inkluzaun (MSSI), Cêo Brites, hala’ o vizita ba dirasaun no instituisaun ne’ebé tutela iha MSSI.
“Ami rua vise mai visita instituisaun ne’ebé tutela hodi servisu hamutuk, maibé haree ba planu IX Governu nian ne’ebé hetan aprovasaun no promulgasaun Prezidente Repúblika mak ami hadi’a maibé la’ós hadi’a dala ida maibé fazeadamente,” nia hateten.
Antes ne’e, Prezidente Institutu Nasionál Seguransa Sosial (INSS), Longuinhos Armando Leite, hateten pagamentu idozu no invalidéz hamutuk 95.000 iha faze dahuluk sei hein orientasaun hosi Ministra Solidariedade Sosial no Inkluzaun (MSSI).
“Ba idozu no invalidéz ne’ebé atu simu osan ne’e kuaze 95.000, ida-ne’e sei hein orientasaun hosi ministra foun, hafoin bele paga tanba buat ita tenke la’o tuir regra. Ami atu halo pagamentu maibé ita tenke rona lai orientasaun hosi ita-nia ministra, entaun seidauk bele realiza. Maibé, kona-ba dadus, orsamentu, ami relata hotu ona ba ministra foun no ami prepardu ona hein de’it orientasaun,” Longuinhos Armando Leite hateten.
Notísia Relevante: Pagamentu idozu-invalidéz 95.000 sei hein orientasaun hosi ministra foun
Jornalista : Osória Marques
Editór : Cancio Ximenes
