iklan

EKONOMIA, HEADLINE

Xanana rekoñese envolvimentu ASEAN ba dezenvolvimentu no prosperidade povu iha rejiaun

Xanana rekoñese envolvimentu ASEAN ba dezenvolvimentu no prosperidade povu iha rejiaun

Primeiru-Ministru, Kay Rala Xanana Gusmão. Imajen Tatoli/Egas Cristóvão

DILI, 08 agostu 2023 (TATOLI)–Primeiru Ministru (PM), Kay Rala Xanana Gusmão, lori Timor-Leste nia naran hato’o felisitasaun ba aniversáriu Asosiasaun Nasaun Sudeste Aziátiku (ASEAN, sigla inglés) ba dala-56 no rekoñese envolvimentu asosiasaun ba dezenvolvimentu no prosperidade povu iha rejiaun.

“Hosi Timor-Leste, ha’u hato’o ami-nia felisitasaun ba ASEAN, tanba iha tinan-56 laran halo ona promosaun estabilidade, unidade ho paz iha rejiaun ne’e. ASEAN promove daudaun ona dezenvolvimentu no prosperidade ba benefísiu rejiaun ne’e nian ho nia povu sira hotu, ho diversidade kulturál, istórika no relijioza ne’ebé boot tebes,” PM hateten liuhosi nota ne’ebé Agência Tatoli asesu, tersa ne’e.

Nia dehan, ASEAN harii ona komunidade ne’ebé nakonu ho respeitu no toleránsia iha Sudeste Aziátiku to’o ohin loron hanesan poténsia ekonómika no dinámika ne’ebé hateke ba futuru ho otimizmu.

“Liu tiha tinan 24 luta ba independénsi no tinan 21 hasoru luta foun, agora ne’e ba konstrusaun ami-nia Estadu demokrátiku ho fundasaun nu’udar nasaun dezenvolvida no sustentável, Repúblika Demokrátika Timor-Leste kontinua buka hatene loloos prinsípiu sira ne’ebé orienta ASEAN iha transformasaun Sudeste Aziátiku hanesan komunidade nasaun konfiansa, amizade no kooperasaun mak hanesan valór ne’ebé halibur hamutuk nasaun sira ne’ebé la hanesan,” nia akresenta.

Notísia relevante :PM Xanana husu líder membru ASEAN fó solusaun ba problema Myanmar

Xefe Governu relata, Timor-Leste hanesan membru fundadór organizasaun intergovernamentál hanaran g7+, ho estatutu hanesan Observadór Permanente iha Organizasaun Nasaun Unida, luta maka’as ba pás no dezenvolvimentu, maibé liu-liu ba konstrusaun Estadu demokrátiku sira ne’ebé respeita direitu umanu ho demokrasia.

“Ida-ne’e objetivu prinsipál ne’ebé hamutuk ho Estadu membru seluk, Timor-Leste buka atu atinje, felizmente prova ba mundu katak Timor-Leste iha ona dalan ne’ebé loos, hanesan bele haree liuhosi partisipasaun pasífika no demokrátika iha Eleisaun Prezidensiál no Parlamentár foin daudaun ne’e. Ami mós bele hasoru dezafiu no aproveita oportunidade boot sira ne’ebé rejiaun ne’e bele oferese. Dala-ida tan, permite ha’u felisita ASEAN no deseja susesu tomak iha konstrusaun ASEAN ne’ebé forte liután, ho respeitu ba direitu umanu no liberdade demokrátika,” nia tenik.

Antes ne’e, Timor-Leste hato’o pedidu adezaun ba ASEAN iha tinan 2011, nune’e daudaun sai ona membru ho estatutu onservadór.

Aleinde ne’e, Ministériu Negósiu Estranjeiru no Kooperasaun (MNEK) kontinua analiza kle’an polítika no kuadru regulamentár, ne’ebé sei aprezenta ba Konsellu Ministru hodi halo aprovasaun no halo mós elaborasaun dokumentu rejime komérsiu externu no enkuadramentu legál sira.

ASEAN kompostu hosi nasaun 10 hanesan Cambodia, Indonézia, Laos, Vietname, Brunei Darusalam, Singapura, Myanmar, Filipina no Thailándia.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!