Abitante Bibileo preokupa ho kondisaun infraestrutura bázika
VIQUEQUE, 09 agostu 2023 (TATOLI)–Konsellu suku Bibileo, postu administrativu Viqueque Vila, munisípiu Viqueque, Basco Soares, hateten, durante ne’e abitante suku Bibileo preokupa ho kondisaun infraestrutura bázika.
“Durante ne’e ami-nia abitante sira ne’ebé hela iha área rurál preokupa tebes ba bee-moos, estrada no eletrisidade tanba kuaze tinan barak ona sira seidauk asesu. Ami mós durante ne’e ezije beibeik ba parte relevante sira maibé seidauk fó resposta ba ezijénsia sira,” Konsellu suku dehan iha suku Bibileo, kuarta ne’e.
Nia haktuir, kondisaun dalan ne’ebé liga ba aldeia tolu ladún di’ak, ne’ebé dalan ne’e hanesan dalan úniku hosi mota Kararas, nune’e bainhira tempu udan abitante no transporte labele halo movimentu no sosa nesesidade bázika ruma. Mota maran maka foin abitante sira tun ba Vila hodi sosa nesesidade bázika ruma.
“Ha’u hakarak husu nafatin ba parte relevante sira, se bele tau konsiderasaun ba abitante sira-nia preokupasaun kona-ba bee-moos no eletrsidade. Eletrisidade importante tanba durante ne’e sira uza lilin no lampu rina iha tempu kalan, seluk maka bee-mos tanba abitante sira durante ne’e tenke la’o kuru bee iha bee-matan hodi konsumu maibé tempu bailoro sira buka bee susar tebes.
Notísia relevante : Servisu Saude Viqueque halo atendimentu masál iha Bibileo
Aleinde ne’e, abitante sira difísil asesu fasilidade saúde tanba dook.
“Pesoál saúde sira mai vizita abitante sira maibé iha tempu bailoro maka sira mai, tempu udan sira labele mai halo konsulta ba abitante sira,” nia akresenta.
Konsellu suku relata, suku Bibileo iha aldeia tolu maka seidauk asesu bee-moos, estrada no eletrisidade hanesan aldeia Laku Uai, Uebae no Manek Klaran ho totál uma-kain 100 resin.
Iha fatin hanesan, abitante aldeia Lakuai, João Caitano Gomes, sente triste tanba tinan barak ona abitante lokál enfrenta problema infraestrutura bázika maibé seidauk rezolve.
“Ami sente triste tanba tinan barak ona ami la sente dezenvolvimentu, liu-liu bee-moos, eletrisidade no estrada. Tanba ne’e, ami hakarak husu na’i-ulun sira atu tau-matan ba ami-nia preokupasaun sira,” nia tenik.
Nune’e mós, Diretór Servisu Saúde munisípiu Viqueque, Pedro da Silva Pereira, haktuir, durante ne’e pesoál saúde sira kada fulan destaka hodi halo atendimentu ba abitante sira iha área rurál, maibé abitante sira hela ho distánsia dook hosi fasilidade saúde.
“Ba oin maka ita haree poítika ruma,” nia adianta.
Suku Bibileo kompostu hosi aldeia Aisahe, Amarleza, Balide Oan, Fato Hosan, Hare Oan, Laco Uai, Mane Claran, Webae, ho populasaun hamutuk 3.156 (sensu 2015).
Jornalista : Vitorino Lopes da Costa
Editora : Julia Chatarina
