VIQUEQUE, 09 agostu 2023 (TATOLI)—Servisu Saúde munisípiu Viqueque halo atendimentu masál ba abitante iha Fatuli, suku Kararas, durante loron-rua, iha ámbitu komemora loron Forsa Armada ba Libertasaun Nasionál Timor-Leste (FALINTIL) ba dala-48.
Diretór Servisu Saúde munisípiu Viqueque, Pedro da Silva Pereira, hateten, atividade ne’e realiza ho kolaborasaun parte Defeza no Servisu Saúde
“Nune’e iha atividade masál ba labarik no ferik katuas sira ne’ebé durante ne’e la asesu ba fasilidade saúde. Hosi atendimentu masál ne’e ami konsege rejista kazu Insfesaun respiratóriu Aguda (ISPA) hamutuk 100 resin,” Diretór Servisu munisipál informa ba Agência Tatoli, iha postu Viqueque Vila, kuarta ne’e.
Notísia relevante : Médiku espesialista 74 hosi HNGV fó konsulta masál ba abitante Uatulari
Ekipa sira ne’ebé halo tratamentu ba abitante sira kompostu hosi enfermeiru, doutór no ekipa móvel x-ray ba moras tuberkuloze.
Durante atividade, ekipa halo screaning ba abitante 120, atendimentu labarik 44, ema boot 70 inklui konsulta matan 25.
“Aleinde konsulta baibain, ita-nia médiku sira halo operasaun kiik ba ema na’in-tolu. Ekipa x-ray kontinua destaka iha Fatuli hodi halo screaning tuberkuloze ba ita-nia abitante sira,” Diretór tenik.
Jornalista : Vitorino Lopes da Costa
Editora : Julia Chatarina
