EBF Kalma Fatukila Viqueque sai área risku tanba besik mota
VIQUEQUE, 09 agostu 2023 (TATOLI)—Eskola Ensinu Báziku Filial (EBF) Kalma Fatukila iha área Fatukila, suku Bibileo, postu administrativu Viqueque, munisípiu Viqueque, sai área risku boot bainhira mosu dezastre naturál tanba besik mota.
“Ami-nia área eskola ne’e agora besik liu ba mota maizumenus ho distánsia metru 50 hosi mota. Rai monu beibeik no sai ameasa ba edifísiu eskola, nune’e presiza Governu ninia intervensaun hodi tau protesaun iha mota hodi satan bee labele estraga edifísiu eskola ida-ne’e. Se la halo intervesaun lais maka mota sei estraga eskola,” Reprezentante Eskola EBF, Francisco Gomes, informa iha resintu eskola.
Notísia relevante : Mota Beaço iha Viqueque nakonu difikulta movimentu transporte
Nia haktuir, bainhira tempu udan parte eskola labele realiza aula prezensiál tanba eskola iha mota sorin no estudante tenke liu hosi mota hafoin to’o eskola.
“Iha ne’e tempu udan estudante sira labele mai partisipa aula tanba eskola iha mota sorin kedan, nune’e presiza ponte hodi fasilita estudante sira hakat ba eskola, se ponte laiha bainhira mota tun ita labele obriga estudante sira tuir aula. Ho preokupasaun ida-ne’e maka ami hakarak hato’o ba parte relevante hodi tau-matan ba ami-nia preokupasaun,” nia hato’o.
Aleinde ne’e, Eskola EBF Kalma Fatukila menus manorin hodi hanorin estudante iha klase 6, daudaun manorin iha na’in-tolu maibé loloos profesór tenke na’in-neen maka bele prienxe rekezitu hanorin.
“Ami menus liu profesór, ne’ebé ami kria fali grupu maka ami na’in-tolu troka malu, tanba só meiu ida-ne’e maka ami durante ne’e aplika tanba sala aula iha de’it neen. Ami hato’o ona pedidu ba edukasaun, maibé sira dehan hein. Maski ho menus manorin maibé ami nafatin iha vontade hodi hanorin estudante tanba parte ida ami hanorin oan sira,” nia hato’o.
Tuir dadus, estudante iha hamutuk na’in-78, kompostu hosi kada aula hahú klase 1 na’in-15, klase 2 na’in-17, klase 3 na’in-14, klase 4 na’in-14, klase 5 na’in-9 no klase 6 na’in-9 no profesór hamutuk na’in-3, permanente na’in-2 no kontratadu na’in-1.
Jornalista : Vitorino Lopes da Costa
Editora : Julia Chatarina
