MALIANA, 09 agostu 2023 (TATOLI) – Komunidade no motorista sira husu ba IX Governu Konstutisionál presiza konsidera estrada ldiresaun hosi kapitál Maliana ba postu administrativu Bobonaro no Lolotoe, munisípiu Bobonaro iha Orsamentu Jerál Estádu (OGE) tinan fiskál 2024 nune’e bele halo konstrusaun foun.
Abitante suku Ai-asa, Filipe de Jesus, sente triste tanba estrada refere dezde okupasaun Indonézia to’o ohin loron Governu seidauk tau prioridade atu rezolve.
Notísia relevante: Prezidente Repúblika ‘sasin’ ba promesa MOP hadi’a estrada Bobonaro-Lolotoe
“Ami-nia estrada hosi Maliana mai to’o Bobonaro ba tán iha Lolotoe ne’ebá ne’e, Governu mak troka hela de’it mós aat ba nafatin de’it, tinan ba tinan ami sempre preokupa, maibé boot sira liu ba mai haree hela, la hatene sente di’ak ka lae, ne’ebé ami husu orsamentu tinan oin nia ne’e tau netik ba estrada ida-ne’e,” nia informa ba Tatoli, iha Galusapulu, kuarta ne’e hafoin viajen hosi Maliana ba Bobonaro.
Nia haktuir, kondisaun ne’e difikulta tebes sira atu halo viajen liuliu iha tempu udan,tanba estrada sira ne’e kuaze ameasadu hotu hosi erozaun.
Situasaun ne’e fó impaktu ba komunidade agrikultór sira atu lori produtu lokál asesu ba merkadu inklui ba nesesidade seluk tan iha kapitál Maliana.
“Ita atu ba mai beibeik mos sente baruk tanba aspál ne’e rohan rohan de’it, sa’e mai iha Maliana to’o Galusapulu sei di’ak oituan, maibé ita liu sae ba Bobonaro ho Loloto’e ne’e, ita lori ema moras ida karik nia bele susar iha dalan, tanba ku’ak boboot de’it, balu até atu kotu tán ona, bailoron hanesan sei di’ak oituan, maibé udan ne’e ita atu viajen mos ta’uk,” nia preokupa.
Motorista Aguna diresaun Bobonaro ba Maliana, Augusto da Costa Pires, husu ba Ministériu Obra Públika atu aselera prosesu estrada refere.
“Ami akompaña iha televizaun foin lalais ne’e, kala fula rua ka tolu liubá hanesan ministru ida uluk ne’e dehan estrada Maliana ho Lolotoe besik halo ona, la sala ministru ne’e dehan sira sukat hotu ona, hein de’it atu loke tender, ne’ebé ami hato’o ba Ministru ida foun ne’e, se bele tau ba prioridade,” nia fó hanoin.
Enkuanatu estrada refere sei benefísia ba populasaun postu Bobonaro, suku 18 ho totál ema na’in 25,347 ho uma-Kain 4,601 no postu Lolotoe suku hitu ho totál populasau na’in 7,695.
Notísia relevante: MOP konklui verifikasaun estrada Maliana ba Bobonario no Lolotoe
Jornalista: Sérgio da Cruz
Editór: Evaristo Soares Martins
